Suenter la victoria dalla davosa jamna ei l’equipa da Schluein Glion puspei viagiada en la tiara sogngagliesa per giugar en la capitala el stadiun Gründemoos encunter il club da ballapei da Winkeln. La perschuasiun da saver gudignar il giug e la fidonza en sesez dalla davosa jamna han denton muncau empau sonda vargada, aschia ei il giug ius a piarder cun 1:3 e la situaziun alla fin dalla tabella ei ussa fetg precara.
Ord munconza d’attaccaders muort blessuras ed absenzas ha l’equipa entschiet en il giug cun in defensur en l’attacca, buca gest igl ideal en in giug decisiv encunter in adversari direct per la relegaziun. Aschia ha l‘equipa da Winkeln surpriu all’entschatta resolut il domini ed ha astgau sittar en las empremas 15 minutas buca meins che sis corners. Suenter in da quels ei igl emprem gol curdaus. Il defensur central Marc Hörler ei siglius il pli ad ault ed ha menau la flanca da dretg cul tgau en gol. Ord il giug ha denton era l’equipa da casa buca creau grondas caschuns da sittar gols. Il 2:0 ei curdaus suenter ina buna mesa ura e suenter che Schluein Glion haveva ulivau il giug sin in penalti sittaus da Fabian Steinemann. La megliera caschun da sittar in gol per Schluein Glion ha Gian Sgier giu cuort avon pausa. Siu culp cul tgau – medemamein suenter in corner – ei denton buc propi gartegiaus, aschia che la balla ei ida sper gol ora.
En la pausa para il trenader Corsin Cavegn da haver anflau ils dretgs plaids per sia equipa, ella ei numnadamein sepresentada in bienton pli engaschada en la secunda mesadad. Ussa han las fideivlas ed il fideivels adherentas ed adherents che han priu la via entochen S.Gagl sut las rodas finalmein era viu acziuns offensivas da lur equipa. In siet da Sattar Afzali ha il goli da Winkeln aunc teniu bravurusamein, cuort avon che l’emprema ura da giug ei ida a fin ha el denton stuiu prender la balla ord la reit. Sunter in foul vi d’Aron Büchler en la zona da puniziun ha igl arbiter schulau penalti e Marino Cavegn ha plazzau la balla ferm e bein el cantun bass seniester. Ussa ha Schluein Glion fatg pressiun per saver egalisar. Quella pressiun ei vegnida interruta en la 72avla minuta cun ina cunterattacca da Winkeln che ha purtau il 3:1 entras Mika Binzen e la decisun. Sin quei gol ha Schluein Glion buca saviu reagar pli, era sche l’equipa ha fiers tut anavon ed ha empruau tut il pusseivel.
Ussa restan aunc dus giugs per mitschar dalla relegaziun ei resta nuot auter che da gudignar quels dus giugs, da far aschi paucas cartas sco pusseivel pervia dils puncts da puniziun e sperar che las ulteriuras equipas involvadas en la decisiun sperdien lur davos giugs. Lu savess ei aunc tonscher, tenor il motto: la speronza miera il davos!
FC Winkeln – US Schluein Glion 3:1 (2:0)
Gründemoos, S. Gagl – 145 aspectaturs. – AR: Solenthaler
Gols: 8. Marc Hörler 1:0; 34. Steinemann 2:0 (penalti), 57. Cavegn 2:1 (penalti), 72. Binzen 3:1.
Winkeln: Staub; Lars Hörler, Marc Hörler, Broger, Haas (85. Bischoff); Djana Casano, Steinemann, Grünenfelder (64. Twumasi), Binzen (75. Musi); Ammann, Eberle (81. Kohler)
Schluein Glion: Hornacek; Casutt, Gian Sgier, Coray (45. Gomes Machado); Cavegn, Michel, Livio Derungs, Dermont (68. Andri Sgier), Büchler; Gallmann (78. Leblebici), Afzali (86. Bundi).
Remarcas: Cartas mellnas: 56. Ammann (foul), 57. Marc Hörler (foul), 90. + 2. Cavegn (sittar naven la balla). – Schluein Glion senza Deplazes, D‘Atria, Matthias Derungs (tuts blessai), Cabalzar (trenament da preparaziun), Vinzens, Egger (absents). – 48. culp cul tgau en la petga da Grünenfelder. – Corners: 8:2.