Schluein Glion e Domat partan ils puncts

Avon ina biala culissa da varga 300 aspectaturas ed aspectaturs eis ei buca gartegiau ni a Schluein Glion ni a Domat da crear grondas occasiuns da sittar gols, aschia ch’il giug ei ius a fin 0:0. Quei remis gida segiramein dapli l’equipa da Domat che quella da Schluein Glion, la quala havess giu ner da basegns da recaltgar treis e buca mo in punct.

Il positiv dil sulet derbi grischun dalla secunda ligia regiunala ei segir la biala roscha d’aspectauras ed aspectaturs ch’ein vegni la sonda da bellezia relaziuns a Crap Gries per guder il giug e la sera. Denter auter ha l’Uniun sportiva Schluein Glion era astgau beneventar in triep da ses fideivels sponsurs che sustegnan ils biars gia dapi onns l’uniun e commembers dil club da fauturs Crap Gries ch’ein medemamein stai envidai al giug. Donn ch’ils sponsurs ed ils fauturs han buc astgau assister ad ina partida cun empau dapli acziuns attractivas avon ils gols. Pil pli ei il giug numnadamein sesplegaus el miez dil plaz ed ils dus golis han buca stuiu mussar grondas paradas. Las defensiuns han giu enta maun ils attaccaders e strusch schau tier schanzas che han valiu da vegnir nudadas sil cedel da notizias dil rapportader. Per Schluein Glion ha Marino Cavegn giu la megliera, per Domat Mario Garcia Agulla, quei eis ei stau.

Per Schluein Glion restan ussa aunc quater giugs per recaltgar ils puncts necessaris per saver mitschar dalla relegaziun, treis da quels ordvart.

US Schluein Glion – FC Domat/Ems 0:0 (1:0)

Crap Gries. – 335 aspectaturs/-as. – AR: Musliu.

Gols: —.

Schluein Glion: Hornacek; Gallmann (64. Deplazes), Coray, Sgier, BĂŒchler; Cavegn, Michel, Livio Derungs, Egger (75. D’Atria, 90.+ 2. Leblebici); Bundi (46. Vinzens), Afzali (79. Casutt).

Domat: Zivanovic; Hanan Beso, Hanad Beso, Hunger, Nsingui; Sabljic (60. Bonderer), Frizzoni, Limani, Gringer; Topalli (71. Garcia Agulla), Spiller (89. Mahir Beso).

Remarcas: Cartas mellnas:  55. Limani (foul), 76. D‘Atria (foul), 90.+ 4. Hanan Beso (foul). – Schluein Glion senza Cabalzar, Dermont, Matthias Derungs (blessai), Gomes Machado (absents). – Corners: 4:8.