Schluein Glion spiarda era il davos giug a casa cun in gol differenza. E pli u meins eis ei stau il medem sco avon duas jamnas. In sbagl en la defensiun all’entschatta dil giug ha schau ir en avantatg Au-Berneck. Quella gada eis ei denton gartegiau a Schluein Glion d’egalisar cuort suenter la pausa. In ulteriur sbagl en la defensiun ha mo quater minutas pli tard puspei purtau en avantatg ils hosps cun 1:2 e tier quei resultat eis ei restau entochen alla fin dil giug.
Ils giugadurs dil trenader Corsin Cavegn fan tut il pusseivel per recaltgar puncts, els vegnan denton buca remunerai el mument per lur sforzs. Adina puspei capetan sbagls fatals en la defensiun che portan l’equipa en disavantatg, e cunquei che ils attaccaders han difficultads da crear schanzas e realisar gols, reussescha ei momentan buca da gudignar giugs. Era sche ils adversaris ein strusch pli ferms. Aschia era sonda vargada a Crap Gries: in giug denter duas equipas ulivas, ei vegnius gudignaus dalla squadra che ha fatg pli paucs sbagls en la defensiun. Quei ei stau Au-Berneck. Aschia resta Schluein Glion sin il davos plaz en la tabella e sa mo aunc sperar da far ei meglier el davos giug dalla prerunda che ha liug sonda proxima. Quei che vegn denton buc ad esser gest sempel, ei l’equipa numnadamein hosp a Mels, ina dallas fermas equipas en la gruppa 1 dalla secunda ligia.
US Schluein Glion – FC Au-Berneck 05 1:2 (0:1)
Crap Gries. – 165 aspectaturs. – AR: Gubic
Gols: 3. Bojaxhi 0:1; 52. Vinzens 1:1; 56. Bojaxhi 1:2.
Schluein Glion: Capaul (72. Alessandro Casutt); Gallmann (82. Leblebici), Matthias Derungs, Livio Derungs (86. Tschalèr), Büchler; Dermont, Sgier, Michel, D’Atria (66. Camenisch); Bundi; Vinzens.
Au-Berneck 05: Staudacher; Navarro, Bekjiri, Popescu, Böhrer; Carlo Lamorte (75. Fabio Lamorte), Varano, Giuliano Lamorte (72. Marino), Lakna (82. Büyüktunalioglu); Smoljanovic (90.+3. Dierauer), Bojaxhi (87. Baumann).
Remarcas: Cartas mellnas: 11. Varano (foul), 25. Büchler (foul), 55. Livio Derungs (foul). – Carta mellen/cotschna: 68. Varano (foul). Schluein Glion senza Gianluca Casutt, Egger (blessai), Gomes Machado (absents), Au-Berneck 05 senza Zivic (serraus). – Corners: 5:3. – 80. siet en la petga da Michel. – 72. Capaul croda ora muort blessura.