Aulta terrada – buca diltut meritada

7:1 ei atgnamein in clar resultat, mo aschi gronda sco ei para, ei la differenza denter las duas equipas atgnamein gnanc stada. En l’emprema mesadad sin in plaz artificial e da miserabla aura cun ina plievgia intensiva ha Schluein Glion elavurau dapli schanzas che ils da casa. Tuttina menavan lez 2:0, cunquei ch’ei han nezegiau duas malsegirtads dils hosps ed ein era buca vegni frenai digl arbiter, era sch’ei ha ferdau tier igl emprem gol ferm da foul cul maun e tier il secund ferm d’offisde. Mo en secunda ligia dat ei gie aunc buca il VAR che havess saviu sclarir quei. Schluein Glion ha giu en tut en quella mesadad quater bunas caschuns da marcar in gol, ha denton munchentau tuttas malamein.

La secunda mesadad entscheiva optimal per Schluein Glion. Ella 52avla minuta marca Linus Tschalùr cul tgau il 2:1 sin ina biala flanca da Luzi Dermont. Quei gol fa curascha ed il umens dil trenader Mate Lekishvili emprovan d’egalisar. Els vegnan denton struffegiai per lur engaschi offensiv cuort suenter in‘ ura da giug. Enteifer mo ina minuta settan ils indigens puspei plitost ord il nuot dus gols e decidan la partida. Schluein Glion emprova bein tut per saver dar aunc ina midada al giug, tut ei denton invan, nuot vul gartegiar. Anzi, sbagls individuals en la defensiun lain sittar ils indigens en las davosas minutas aunc ulteriurs treis gols che meinan al resultat clar. Mo sco gia scret: quel ei forsa curdaus ora per in per gols memia aults per ils indigens.

FC Abtwil-Engelburg – US Schluein Glion  7:1 (2:0)

Spieserwies, Abtwil. – 30 aspectaturs. – AR: Aggeler

Gols: 4. Gröli 1:0, 25. Spescha 2:0, 52. TschalÚr 2:1, 63. Gröli 3:1, 64. Speck 4:1, 70. Sturzenegger 5:1, 90. Sabit 6:1, 90.+2 Menet 7:1.

Abtwil-Engelburg: Altermatt; Isler, Cardon (70. Höhener), Klarer, Messmer (40. Speck); Forster, Ledergerber, Koller, Sturzenegger; Spescha (70. Menet), Gröli (69. Sabit).

Schluein Glion: Capaul; Dermont, Gian Sgier, Andri Sgier, BĂŒchler; Gomes Machado (86. Lerchi), Michel (72. Leblebici), Livio Derungs, Vinzens; TschalĂšr, Lekishvili.

Remarcas: Cartas mellnas:  33. Vinzens + Ledergerber (malsportadad), 49. Andri Sgier (foul), 55. Klarer (foul), 59. Gröli (foul).  â€“ Schluein Glion senza Gianluca Casutt e Egger (blessai), Mathias Derungs + Gallmann (absents), D’Atria (serraus). – Corners: 5:2.