In giug d’emblidar beinspert

Per ina gada dat ei buca da scriver bia. En in giug lungurus e practicamein senza occasiuns da marcar sin omisduas varts, spiarda Schluein Glion meritadamein cun 0:2 encunter Montlingen. Duront igl entir giug ha l’equipa da casa sittau sulettamein ina gada sin gol e quei suenter 89 minutas e 15 secundas.

Il giug entscheiva buca bein per Schluein Glion. Gia suenter siat minutas lai l’entira defensiun cuorer Marko Zdravkovic cun la balla vid il pei davon la lingia da sedisch vi e sittar in ferm e plazzau siet el cantun bass al 0:1. Quella acziun ei stada per l’entira emprema mesadad pli u meins la suletta acziun productiva en ina dallas duas zonas da puniziun.
Da pausa ha il trenader Alessandro Giacomelli fatg duas midadas e sperau da dar aschia niev anim al strusch in’attacca gartegiada dall’equipa indigena. Buca da cumparegliar cun il giug da sonda vargada encunter Rorschach-Goldach. Aschia eis ei vegniu sco ei ha stuiu vegnir. Suenter 75 minutas ei in giugadur dils hosps vegnius frenaus en la zona da puniziun cun in foul ed igl arbiter ha schulau in penalti. Cun in siet ferm e segir ha Florian Haltiner nezegiau quella caschun naven dil punct d‘endisch meters e marcau il 0:2 ed aschia decidiu il giug. Ils giugadurs da Schluein Glion ein numnadamein era suenter quei secund gol buca stai habels da reagar e crear occasiuns da marcar. L’emprema ga sin gol han ei – sco gia menziunau – sittau suenter varga 89 minutas!

US Schluein Glion – FC Montlingen 0:2 (0:1)

Crap Gries. – 200 aspectaturs. – AR: Eicher

Gols: 7. Zdravkovic 0:1, 75. Haltiner 0:2 (p.).

Schluein Glion: Hornacek; Cavegn, Routek, Livio Derungs, Welter; Dermont (60. Truffer), Gomes Machado (46. Bundi), Luca Vinzens (80. Hossmann), Gilian; Tiziano Vinzens (46. Airaghi), Caduff.

Montlingen: Hehle; Bojaxhi, Bont, Haltiner, Walt; Kühne (81. Mohammed), Lüchinger, Wörnhard, Topcu (87. Meier); Thurner (90.+2. Hasler), Zdravkovic (90.+1. Malcarida).

Remarcas: Cartas mellnas: 59. Bojaxhi, 65. Caduff, 75. Thurner (tuts per fouls) . – Corners: 2:3.