Dumengia vargada ha Schluein Glion gudignau per la secunda gada en quest campiunadi encunter il capogruppa Bogn Ragaz ed aschia reduciu il disavantatg da puncts sin mo in punct pli. La tensiun en la gruppa 1 dalla tiarza ligia resta pia entochen alla fin. Gudogna Bogn Ragaz dumengia proxima en la davosa runda ordvart encunter Domat ein els campiuns, spiardan ei ni giogan ei pari e Schluein Glion gudogna siu davos giug a casa encunter Valposchiavo Calcio, ei l’equipa sursilvana sigl emprem rang.
Avon ina gronda culissa d’aspectaturas ed aspectaturs han igl emprem ed il secund dalla tabella mussau naven dall’entschatta in giug spert, cumbattiu e per la tiarza ligia fetg attractiv. A Bogn Ragaz tunscheva in remis per segirar igl emprem rang e la promoziun per la secunda ligia, Schluein Glion stueva gudignar il giug per aunc haver ina pintga schanza sin quei emprem rang. Aschia eis ei lu era stau l’equipa visitadra che ha encuretg pli engaschau l’offensiva. Duront l’entira emprema mesadad ha ella giu in lev surpli dil giug e creau entginas bunas caschuns da marcar. La megliera ha Lars Caduff giu en la 33avla minuta. Siu siet plazzau ha il davos um da Bogn Ragaz, Flurin Ambühl, denton menau cul maun cun ina fetg biala parada sur la traversa ora.
Suenter pausa ei l’equipa indigena vegnida meglier el giug e ha era entschiet ad encurir pli detschartamein la via al gol. Grondas occasiuns da marcar ei il capogruppa denton buca vegnius da crear. En las davosas diesch minutas ei il giug lu vegnius aunc inagada empau pli animaus, omisduas equipas han encuretg la decisiun. En la 84avla minuta ha igl arbiter annulau gest dus gols pervia posziuns d’ordgiug. Igl emprem in da Bong Ragaz lu in da Schluein Glion. En la 86avla minuta ha Manuel Horni giu la gronda pusseivladad da decider il giug suenter in pass falliu d’in giugadur da Schluein Glion. El ha saviu cuorer tut persuls encunter il gol, ha denton anflau en David Hornacek siu meister. Cun ina reacziun extraordinaria ha el menau la balla cul pei dalla vart ora e salvau il remis. Cuort pli tard ei la decisiun curdada en favur da Schluein Glion. Suenter in siet da cantun da Fabrizio Cavegn ei il defensur Matthias Derungs seglius il pli ad ault e ha sittau cul tgau la balla en la reit. Ussa ha Bogn Ragaz naturalmein empruau tut il pusseivel per aunc saver egalisar. Tier in culp liber ei perquei schizun il goli ius en l’offensiva; quei ha Schluein Glion nezegiau cun saung freid: il culp liber ei vegnius frenaus sin la lingia da sedisch e la cunterattacca ei vegnida lantschada ladinamein. La balla ei vegnida survida a Lars Caduff che ha cuglienau il davos defensur e sittau en tutta ruasseivladad il secund gol per Schluein Glion.
La victoria per Schluein Glion ei segir stada meritada, ha l’equipa dalla Surselva bein investau dapli en l’offensiva ed encuretg cun pli gronda vehemenza la victoria. La davosa runda da campiunadi porta ussa la decisiun. Bogn Ragaz sto giugar ordvar encunter Domat, Schluein Glion sa dar a casa encunter Valposchiavo Calcio, mirar tgi che sa giubilar alla fin.
FC Bogn Ragaz – US Schluein Glion 0:2 (0:0)
Ri-Au. – 450 aspectaturs. – AR: Weber
Gols: 88. Matthias Derungs 0:1, 90.Caduff 0:2.
Bogn Ragaz: Ambühl; Gerber, Kohler, Bergamin, Kressig; Näf, Orlando Caluori, Horni, Bigger; Rauti (87. Kunfermann), Kühne (46. Antunovic).
Schluein Glion: Hornacek; Dermont, Matthias Derungs, Livio Derungs, Sergio Welter; Gomes Machado (48. Bundi), Luca Vinzens (78. Giacomelli), Marino Cavegn, Tiziano Vinzens (90.+3. BĂĽchler); Fabrizio Cavegn (89. Gartmann), Caduff.
Remarcas: Cartas mellnas: 26. Horni (foul), 84. Giacomelli, 90.+ 4. Dermont (omisdus per reclamar). – Schluein Glion senza Andreoli, Truffer (blessai). – Corners: 4:8.