Schluein Glion gudogna il giug da campiunadi da 3. ligia encunter Walenstadt cun 4:0, quei suenter ina prestaziun matura cun biaras bialas acziuns offensivas e senza grondas schanzas per igl adversari.
Il aspectaturs e giugadurs da reserva ein strusch vegni da seser giu sin lur plaz che Fabrizio Cavegn ha gia marcau igl emprem gol per sias colurs. Suenter in bi pass ella profunditad da Luzi Demont ha Tiziano Vinzens nezegiau sia spertadad e finezia tecnica e purtau la balla sper dus adversaris vi entochen sin la lingia da fund. Da leu ha el dau in pass anavos sil punct da penalti, nua Fabrizio Cavegn ha giu neginas breigias da metter la balla per il 1:0 sper il goli da Walenstadt vi. Suenter il gol han ils giugadurs indigens buca schau luc e vinavon empruau da crear schanzas. Ella 10avla minuta ha aschia Rui Machado giu ina buna schanza da marcar, quei puspei suenter in pass da Luzi Dermont sin Tiziano Vinzens ed ina flanca en la direcziun dil cantun liung dil gol da Walenstadt. En quei stil eis ei lu era iu vinavon. Oravontut Tiziano Vinzens ei adina puspei vegnius da crear bunas schanzas, las qualas ein denton tuttas bu vegnidas nezegiadas da ses congiugadurs. En la 35avla minuta ei lu per l’emprema gada era Walenstadt vegnius tier ina schanza, quei suenter ina flanca dalla vart dretga ed in culp cul tgau sil gol da Hornacek. Cuort avon la pausa ei lu il 2:0 per il caucasa tuttina aunc curdaus. Suenter in bien pass da Lars Caduff en la zona da 16 da Walenstadt ei Nathan Gartmann staus pli sperts che siu adversari e ha marcau il secund gol per l’USSI. Cun quei resultat ein las duas equipas lu era idas en la pausa.
La secunda mesadad han omisduas equipas entschiet en cun las medemas formaziuns ed era vid il cuors dil giug ha ei midau nuot. L’equipa indigena controllescha il giug e lai tier paucas acziuns digl adversari. En la 56avla minuta vegn Marino Cavegn agl ur dalla zona da 16 tier la balla e marca cun in bellezia siet da distanza il 3 :0 per Schluein. Suenter il 3 :0 ha il trenader Alessandro Giacomelli midau en in suenter l’auter tuts siat giugadurs da reserva. Vid il giug han denton era quellas midadas bu giu gronda influenza. L’equipa indigena ha vinavon dominau igl adversari e creau schanzas per marcar. Quei ei ton pli remarcabel en vesta che duront las davosas 20 minutas eran bu meins che 6 juniors dalla USSI sil plaz, pia giugadurs cun annada 1999 ni pli giuven. En la 90avla minuta eis ei lu era stau il pli giuven dils juniors, numnadamein puspei Fabrizio Cavegn, che marca suenter ina biala acziun dalla ala dretga si il gol tier il resultat final da 4:0. Raffaele Airaghi veva lantaschau Marino Cavegn cun in pass ella profunditad, il qual ha lu dau in pass exact avon il gol nua siu frar Fabrizio Cavegn spitgava puspei.
Suenter quella victoria vala ei per l’equipa da Schluein Glion da sesemtgar bein per il giug dalla fin d’jamna proxima. Lu ei l’emprema equipa dalla US Schluein Glion numnadamein sin viseta tier il cappogruppa a Bogn Ragaz. La actuala situaziun ella tabella garantescha per in interessant giug. Sche Bogn Ragaz fa silmeins in pari cun Schluein, lu realiseschan els igl emprem plaz ella tabella ed aschia la promoziun en secunda ligia. Vessan els denton da piarder, lu decida la davosa runda da campiunadi tgi che vegn promovius. Il giug ha liug gliendisdis, ils 10.6.2019 sin la plazza sportiva Ri-Au a Bogn Ragaz.
US Schluein Glion – FC Walenstadt 4:0 (2:0)
Crap Gries. – 185 aspectaturs.
Gols: 2. Fabrizio Cavegn 1:0, 44. Nathan Gartmann 2:0, 56. Marino Cavegn 3:0, 90. Fabrizio Cavegn 4:0.
Schluein Glion: Hornacek; Dermont, Matthias Derungs, Giacomelli (78. Silvan Welter), Dermont (73. Sergio Welter); Machado (71. Airaghi), Gartmann (62. Maissen), Luca Vinzens (78. Wellinger), Marino Cavegn, Tiziano Vinzens (58. BĂĽchler); Caduff.
Walenstadt: Ademi; Sestito, Zogg, Gmür, Skenderi; Enrico D’Agostino, Haliti, Gian Luca D’Agostino, Loop; Rikic, Prisset
Remarcas: Cartas mellnas: 55. Haliti (foul), 65. Zogg (foul). – Corners: 5:5.