Suenter ina prestaziun desolata ell’emprema mesadad ei l’USSI2 aunc vegnida da spindrar l’honur cun sittar treis gols ella secunda mesadad ed aschia silmeins prender a casa in punct da Cuera.
Cun sulegl barschont e da temperaturas da rodund 30°C ell’umbriva ha l’USSI2 durmiu giu cumpleinamein las empremas 25 minutas da quei giug. Igl agir memia passiv dils hosps ha l’equipa da Cuera nezegiau senza cumpassiun per ir en avantatg cun 3:0. Grazia ad in penalti eis ei gartegiau a nossa secunda da scursanir sin 1:3 ella 28avla minuta. Tgi che ha tertgau ch’il giug dall’equipa en mellen vegni uss megliers, ei vegnius trumpaus. Aunc avon pausa ha l’equipa da Cuera3 alzau grazia ad in penalti sin 4:1 ord lur vesta.
Pér grazia al plaid da pausa dil trenader, Silvan Frehner, ed entras entginas midadas da sistem ha l’USSI2 propi anflau en quei giug. Tut ils 11 en mellen han aunc inaga cumbattiu cun tgierp ed olma ellas secundas 45 minutas. Aschia eis ei propi aunc gartegiau d’egualisar il resultat entochen ella 80avla minuta. Ils treis gols ein per part curdai suenter bialas acziuns, combinadas o bein. Ellas davosas minutas dil giug havess l’equipa dalla Foppa perfin aunc giu la caschun da gudignar il giug, quei fuss denton probablamein stau pretendiu empau da memia suenter la fleivla emprema mesadad. Aschia ei il giug ius a fin cun in resultat da hockey da 4:4.
El davos giug dalla sesiun 2018/19 frunta l’USSI2 sill’equipa da Trun/Rabius, gliendisgis ils 10-06-2019 allas 16:00 a Schluein.
Cuera 97 3 – US Schluein Ilanz 2 4:4 (4:1)
Obere Au, Cuera
Gols: 2. Cuera 1:0, 15. Cuera 2:0, 25. Cuera 3:0, 28. Gian Sgier (penalti) 3:1, 44. Cuera (penalti) 4:1, 58. Ronny Della Morte 4:2, 70. Marc Camenisch 4:3, 80. Fabian Coray 4:4
US Schluein Ilanz 2: Marco Cavegn; Dario Casutt (82. Dario Derungs), Patrick Camenisch (46. Robin Studer), Marc Camenisch, Ivan Derungs (30. Arno Panier); Noah Weber (46. Fabian Coray), Gian Sgier, Dennis Camenisch, Livio Casutt; Ronny Della Morte, Dario Derungs (72. Noah Weber)
Remarcas: admoniziuns USSI2: neginas, absenzas USSI2: Roni Caminada (militar)
Rapport: Marco Cavegn