En in giug emoziunal ha l’USSI 2 recaltgau ils emprems treis puncts egl emprem giug da campiunadi digl onn 2019. Menau al success han il bien spért d’equipa e la prestaziun disciplinada ella defensiun.
Suenter ina minuta da commemoraziun ha il campiunadi 2019 era entschiet per la secunda da Schluein Glion, buc sempel da seconcentrar sil ballapei en da quels muments. Tuttina ha l’equipa da casa anflau bein el giug. Gia ella 17avla minuta ei Dario Derungs vegnius lantschaus ella gassa ed ha giu negina breigia da stuschar la balla sper il goli da Razén vi agl 1:0. Mo cuort pli tard han ils hosps saviu egualisar agl 1:1 cun in penalti suenter in foul ella da sedisch dall’USSI. Quei gol ha denton buc pudiu irritar nossa secunda. Anzi, cun bunas combinaziuns e per part era entras sbagls digl adversari ei l’USSI 2 vegnida da crear entgina schanza da marcar. Ella 28avla minuta eis ei lu reussiu a Gian Sgier da sittar il 2:1 cun in siet ord il smugl ella da sedisch digl adversari. Cun quei resultat eis ei iu ella pausa.
Ella secunda mesadad ha l’equipa da casa surschau il dictat dil giug agl SC Razén. Paucas staffettas culla balla cultivadas e biaras ballas aultas spedidas encunter anavon dall’USSI 2 han buca fatg pli emperneivels il giug per ils aspectaturs. Denton era als hosps da Razén ha buc bia vuliu gartegiar. Aschia ha la defensiun dall’USSI entuorn la Camenisch Beton SA pudiu tener il resultat entochen la fin dil giug. Ils treis puncts restan pia a Schluein. Treis puncts ella secund mendra liga da ballapei dalla Svizra, che valan strusch ils fiars dil giavel sin quei mund, che fan denton bein all’olma.
El proxim giug frunta la secunda dall’USSI sil CB Laax, venderdis, ils 26-04-2019 allas 20:00 a Laax. Mo dus gis pli tard schai il giug ordeifer encunter il capogruppa da Celerina sil program.
US Schluein Ilanz 2 – SC RazĂ©n 2:1 (2:1)
Crap Gries, Schluein
Gols: 17. Dario Derungs 1:0, 18. SC Razén (penalti) 1:1, 28. Gian Sgier 2:1
US Schluein Ilanz 2: Marco Cavegn; Sven Brasser, Patrick Camenisch, Marc Camenisch, Ivan Derungs (61. Livio Casutt); Arno Panier, Gian Sgier, Dennis Camenisch, Ronny Della Morte (86. Ronny Panier); Mauro Arpagaus, Dario Derungs (73. Curdin Bundi)
Admoniziuns USSI 2: 67. Dario Derungs, 78. Mauro Arpagaus