In gol en mintga mesadad ha tunschiu a l’equipa da Schluein Glion per gudignar igl emprem giug da campiunadi dalla runda da primavera encunter l’equipa da Landquart Segneradi 2:0. En in mo pauc attractiv giug ha Schluein Glion meritau la victoria, quei denton senza perschuader diltutafatg.
Sco avon in onn ha Schluein Glion entschiet la secunda part dil campiunadi encunter l’equipa da Landquart. Haveva ei tunschiu avon in onn sin la plazza sportiva Ried mo per in remis, ha l’equipa d’Alessandro Giacomelli purtau quella gada tut ils treis puncts si dil Segneradi. All’entschatta ha l’equipa da casa pariu empau pli agressiva ed ei sepresentada ina duas gadas malsegira en la zona da puniziun dil hosps. La megliera caschun ha Davide Rosafio munchentau cun plazzar ina biala flanca cul tgau mo per pauc sur la traversa ora. Schluein Glion ein vegni malsegirs cun ballas liungas ord l’atgna defensiun, pil pli sittadas cun gronda precisiun da Livio Derungs. Las meglieras caschuns han Luca Vinzens e Lars Caduff munchentau. Luca Vinzens ha buca dumignau la balla sper il goli vi e Lars Caduff ha dumignau gliez, perseunter tuccau mo la petga! Cuort avon la pausa eis ei lu tuttina aunc gartegiau a Schluein Glion dad ir en avantatg. Suenter in siet da cantun ei la balla vegnida rebattida sin Serafin Bundi e lez ha battiu il davos um da Landquart cun in siet precis da bien 18 meters el cantun bass dretg.
Suenter pausa ha Schluein Glion stuiu giugar encunter il vent. Landquart ha empruau da far pressiun e prender il giug enta maun. Quei ei denton buca reussiu bein, ils giugadurs da Schluein Glion ein adina puspei seliberai e han aschia creau pliras bunas caschuns da marcar il secund gol e francar la victoria. Quei ei gitg buca gartegiau, aschia ch’ils numerus adherents che han susteniu lur equipa era a Landquart, han stuiu spitgar entochen vargau l’otgontavla minuta avon che la victoria ei vegnida segirada. En l’otgontatreisavla minuta ha Nathan Gartmann gudignau in cumbat en l’atgna mesadad e lantschau Marino Cavegn dalla vart dretga, lez ei curius cun la balla en la zona da puniziun e ha tuschau ella cun precisiun travers a Lars Caduff che ha sittau il secund gol.
Aschia ei la partenza en la secunda mesadad dil campiunadi gartegiada a Schluein Glion stupent, cunquei che Bogn Ragaz ha era gudignau, resta l’equipa Sursilvana sil secund plaz. Proxim vendergis, la sera allas 20.30 uras, ha liug a Crap Gries sco proxim giug da campiunadi il derbi encunter il CB Lumnezia.
CB Landquart-Segneradi – US Schluein Glion 0:2 (0:1)
Ried. – 102 aspectaturs. – AR: Aebi
Gols: 40. Bundi 0:1, 83. Caduff 0:2.
Landquart: Colombo; Roffler, Mittner, Oettle, Kolev (46. Weber); Martin, Maurer (65. Gashi), Oswald, Pirovino (85. Schumacher), Petrovic (59. Fausch); Rosafio (65. Mari Torres).
Schluein Glion: Hornacek; Dermont (79. Gartmann), Berni, Livio Derungs, Möglich (53. Sergio Welter); Bundi, Luca Vinzens, Marino Cavegn, Tiziano Vinzens; Fabrizio Cavegn (53. Giacomelli/86. Andreoli), Caduff (90. Tesic).
Remarcas: Cartas mellnas: 51. Petrovic (reclamar), 71. Martin (foul), 80. Sergio Welter (foul). – Schluein Glion senza Silvan Welter (absents). – 25. siet en la petga/siet en la latta Schluein Glion. – Corners: 5:8.