El davos giug da casa da quest campiunadi ha l’equipa da Schluein Glion mussau ina buna prestaziun e gudignau cun 4:2 gols encunter Montlingen. Giubilau ha suenter quella victoria denton negin a Crap Gries. Cunquei che las equipas da St. Margrethen ed Au-Berneck han el medem temps era recaltgau puncts ei la relegaziun en la tiarza ligia stada decidida. Donn, cun las prestaziuns dalla primavera havess l’equipa meritau da restar en secunda ligia, las prestaziuns en la runda d’atun ein denton stadas memia fleivlas.
Avon ina biala retscha da puspei varga 300 aspectaturas ed aspectaturs ha l’equipa da Schluein Glion entschiet il giug cun gronda pressiun offensiva. Gia en la secunda minuta eis ei aschia gartegiau dad ir en avantatg entras in culp cul tgau da Marino Cavegn suenter in corner. En la 15avla minuta ha il medem giugadur menau la balla puspei cul tgau en la petga e munchentau aschia mo per pauc d’alzar il resultat. Naven dalla 25avla minuta ein ils hops lu vegni empau meglier el giug ed han era giu enqual occasiun da sittar gols. Inagada ha denton il defensur Gianluca Coray frenau in siet cuort avon lingia, ina ga ha David Hornacek mussau ina ferma parada e cura che la balla ha anflau la via en la reit ha igl arbiter buca schau valer il gol muort ina posiziun d’offside. Cuort avon pausa havess Marino Cavegn saviu sittar siu secund gol. El ei curius tut persuls encunter il goli da Montlingen ha denton forsa giu memia bia temps da studegiar en tgei cantun sittar la balla, aschia ch’el ha sittau ella sper gol ora!
Suenter pausa han ils indigens encuretg pli decisiv d’alzar il resultat. Quei ei lu era reussiu stupent. Il 2:0 ha Sattar Afzali sittau en la 54avla minuta ed il 3:0 ha il giuven giugadur Gianluca Casutt realisau en la 67avla minuta. Mintgamai ha Marino Cavegn dau il pass decisiv ed ei aschia avanzaus agl um dil giug. Tschun minutas avon la fin ha Murat Leblebici era aunc tuccau la noda ed aschia decidiu il giug definitivamein. Vi dalla victoria han numandamein era ils dus gols en las davosas minutas da Montlingen entras Mauro Malacrida ed Sidinei de Olivera saviu midar nuot pli. Mo sco scret: igl ei stau ina victoria cun in gust plitost amar.
US Schluein Glion – FC Montlingen 4:2 (1:0)
Crap Gries. – 360 aspectaturs/-as. – AR: Ibraimi.
Gols: 2. Cavegn 1:0; 54. Afzali 2:0, 67. Casutt 3:0, 85. Leblebici 4:0, 88. Malacrida 4:1, 90. + 1. de Oliveira 4:2.
Schluein Glion: Hornacek; Dermont (46. Gallmann), Livio Derungs, Coray, BĂĽchler; Cavegn (75. Gomes Machado), Michel, Sgier, Egger (46. Vinzens); Bundi (67. Casutt), Afzali (81. Leblebici).
Montlingen: Wittwer; Malacrida, Bont (72. Wörnhard), Klingler, Haltiner (72. Sandro Lüchinger); de Oliveria, Nando Lüchinger (72. Ramadani), Idalgo Infante (58. Livio Lüchinger), Calgar; Istrefi, Bojaxhi (58. Niklaas).
Remarcas: Cartas mellnas: 17. Afzali (foul). – Schluein Glion senza Cabalzar, Deplazes, D’Atria, Matthias Derungs (blessai). – 15. culp cul tgau en la petga da Cavegn. – Corners: 5:5. – Il giug ha entschiet cun 15 minutas retard, cunquei che ils arbiters ed ils hops ein arrivai memia tard a Schluein muort las collonas d’autos en la Val dil Rein.