Finalmein puspei ina victoria per Schluein Glion

Meritadamein ha Schluein Glion astgau festivar el giug encunter il club da ballapei Ruggell sia secunda victoria en quest campiunadi. Cun empau dapli saung freid havess il resultat aunc saviu curdar ora empau pli aults, mo la finala quentan ils treis puncts recaltgai. Quels dattan anim e speronza per ils proxims giugs.

Per Schluein Glion ei la partida encunter ils hosps dil Principadi stada in tec sco il giug dalla davosa schanza. Ina victoria ei stada necessaria per buca piarder il cuntact cun las equipas el davos tierz dalla tabella. Aschia ei la squadra era sepresentada. Naven dalla entschatta ha ella cumbattiu per mintga balla ed empruau da vegnir cun spertas attaccas sur las alas al success. Quei ha lu era purtau fretg, suenter haver munchentau ina buna caschun da sittar en avantatg sia equipa en la dieschavla minuta ha Sattar Afzali marcau treis minutas pli tard il 1:0. El ei vegnius survius da Tiziano Vinzens, il qual ei mitschaus dalla vart seniastra a siu defensur ed ha surviu igl attaccader central ideal. Entochen pausa ha Afzali aunc giu ina buna caschun da marcar suenter in pass en profunditad da Livio Derungs. Il siet empau malplazzau ha denton anflau exact la via els mauns dil goli. Ils hosps han entochen pausa giu neginas caschuns da far in gol.

Era suenter pausa ha practicamein mo Schluein Glion creau occasiuns malsegiras avon il gol. Quellas ein denton tuttas vegnidas munchentadas, danora quella en la 63avla minuta. En quella minuta ha il goli numnadamein, suenter haver fatg in sbagl cun vuler sittar naven la balla returnada dad in agen giugadur, mess a tiara Afzali en la zona da puniziun e sfurzau igl arbiter da schular in penalti. Quella caschun ha Marino Cavegn buca schau mitschar. Cun in siet ferm e precis el cantun seniester bass ha el procurau per il resultat final.

US Schluein Glion – FC Ruggell 2:0 (1:0)

Crap Gries. – 225 aspectaturs. – AR: Koster

Gols: 13. Afzali 1:0; 63. Cavegn 2:0 (penalti).

Schluein Glion: Capaul; Gallmann, Coray, Sgier, Büchler; Cavegn, Michel, Livio Derungs (78. Leblebici), Egger; Vinzens (73. Gomes Machado), Afzali (90. Stabile).

Ruggell: Dietsche; Hasler, Büchel, Maag, Dukac (60. Micesvki); Schreiber, Ospelt, Marxer, Adejumo (55. Eidenbenz); Rashiti, Kardesoglu.

Remarcas: Cartas mellnas:  62. Dietsche (foul), 66. Derungs (foul).   – Schluein Glion senza Bundi, Deplazes, Dermont, Matthias Derungs (tuts blessai), D’Atria (serraus), Cabalzar (trenament da preparaziun), Violi (absents). – 89. Culp liber en la petga da Ospelt. – Corners: 4:8.