Schluein Glion: Vulviu il giug e lu tuttina aunc spiars

L’equipa da Schluein Glion munchenta la dumengia suentermiezgi giu a Montlingen in‘ulteriura buna caschun da recaltgar puncts. Suenter esser en disavantatg cun 0:1 da pausa, gartegia ei entochen la siatontavla minuta da volver il giug cun dus gols cul tgau. Sbagls individuals han denton lubiu a Montlingen d’egalisar e la finala schizun da decider quei giug impurtont e da surdar a Schluein Glion la latiarna cotschna.

L’equipa da casa ha giu duront l’entira emprema mesadad da quella partida denter il davos ed il secund davos dalla tabella empau dapli dil giug, senza denton haver grondas pusseivladads da sittar gols. Ei ha duvrau in penalti suenter in foul en la zona da puniziun per che Michel Gadient sappi sittar il 1:0. Siu siet dil punct d’endisch meters ha Flurin Capaul bloccau, encunter il secund siet ha el denton saviu far nuot. Suenter la pausa ha Schluein Glion lu fatg dapli per l’offensiva e creau bunas acziuns en la mesadad dall’equipa da casa. En cuort temps eis ei aschia era gartegiau d’egalisar e schizun d‘ir en avantatg. Matthias Derungs ha menau cul tgau in tir liber sittaus da Livio Derungs en la reit e Tiziano Vinzens ha medemamein fatg in in gol cun in siet cul tgau, quei sin ina flanca lingua e precisa da Luzi Dermont. Quei avantatg havess Schluein Glion ussa stuiu mirar da purtar a casa. Denton sco gia descret ei quei buca gartegiau! Donn, ussa restan aunc dus giugs avon la pausa d’unviern a casa encunter Au-Berneck ed ordvart encunter Mels. En quels dus giugs sto Schluein Glion far aunc inagada tut il pusseivel per recaltgar ulteriurs puncts per buca stuer passentar quella pausa alla cua dalla tabella.

FC Montlingen – US Schluein Glion  4:2 (1:0)

Kolbenstein. – 230 aspectaturs. – AR: Ibraimi

Gols: 22. Gadient 1:0 (penalti), 55. Matthias Derungs 1:1, 69. Vinzens 1:2, 72. Caglar 2:2, 75. Istreti 3:2, 90. Istreti 4:2.

Montlingen: Fabian LĂŒchinger; Malacrida, Bont, Heeb (57. Istreti), Eugster (66. Nando LĂŒchinger); KĂŒhne (91. Ramadan), Calgar (86. Meier), Christof; Gadient, Haltiner.

Schluein Glion: Capaul; Dermont, Matthias Derungs, Livio Derungs, BĂŒchler; Michel, Sgier, Gomes Machado (45. Gallmann), Vinzens; TschalĂšr (74. Della Morte), Stabile (46. D‘Atria).

Remarcas: Cartas mellnas:  44. Michel (foul), 63. KĂŒhne (foul), 83. Christof (foul), 90.+3. Sgier (foul), 90.+3 Nando LĂŒchinger (malsportadad).  â€“ Schluein Glion senza Bundi, Gianluca Casutt, Egger (blessai). – 33. siet en la petga Gadient.  â€“ Corners: 8.2.