Il giug denter ils vischins da tabella ei staus naven dalla bial‘entschatta fetg cumbattius. La finala ha in gol schenghegiau da Schluein Glion decidiu il giug en favur dalla’equipa da S. Gagl. All’equipa da casa ha ei buca vuliu gartegiar da marcar in gol era sch’ils giugadurs han fatg tut il pusseivel ed empruau ei entochen alla fin.
Il hosps da Winkeln han entschiet agressiv, cun engaschament il giug a Crap Gries ed han fatg gronda pressiun sin mintga giugadur da Schluein Glion che menava la balla. Quella pressiun permanenta ei lu era stada la cuolpa che il sulet gol ei curdaus. En la 14avla minuta ha Flurin Capaul vuliu baghegiar si il giug naven da davos ed ha sittau la balla a Gian Sgier. Lez ei immediat vegnius attaccaus da Joel Eberle ed ha piars la balla a tal. Il siet da Eberle ha Capaul aunc saviu deviar mo la balla ei setschentada sil pei da Marc Grünenfelder, il qual ha buca schau supplicar daus gadas ed ha marcau il 0:1.
Suenter quei gol ei Schluein Glion vegnius empau meglier el giug ed ha era saviu crear entginas acziuns offensivas che havessan saviu purtar success. Il pli datier dad egalisar ei segir Andri Michel staus. Siu siet da 20 meters ha il goli da Winkeln denton deviau cun bravura. Suenter il tè da pausa ha l’equipa da S. Gagl surschau il far il giug pli e pli a Schluein Glion ed ei seconcentrada da defender il resultat e forsa haver success cun ina cunterattacca. Ils da casa han entochen alla fin cumbattiu fervent e fatg tut il pusseivel per sittar silmeins in gol. Mo quei ha buca vuliu gartegiar, memia biars pass el center dil giug ein stai memia pauc precis ed era las flancas da dretg e seniester han buca anflau il dretg adressat, aschia che Schluein Glion ha piars il giug. Quei havess buca stuiu esser, ina buna caschun da recaltgar puncts ei vegnida munchentada.
US Schluein Glion – FC Winkeln 0:1 (0:1)
Crap Gries. – 255 aspectaturs. – AR: Solenthaler
Gols:14. Grünenfelder 0:1.
Schluein Glion: Capaul; Dermont, Matthias Derungs, Livio Derungs, Büchler; Sgier, Michel, D’Atria (66. Gomes Machado), Bundi (56. Tschalèr); Della Morte (46. Gallmann), Vinzens.
Winkeln: Schaub; Marc Hörler, Lars Hörler, Broger, Haas; Steinemann (61. Ammann), Djana Casado, Müller (76. Räber), Rölli; Eberle (71. Binzen), Grünenfelder.
Remarcas: Cartas mellnas: 24. Dermont (foul), 53. D‘Atria (foul), 72. Lars Hörler (foul), 79. Koller (trenader per reclamar), 81. Büchler (reclamar), 83. Djana Casado (foul), 86. Rölli (maun). – Carta cotschna: 56. Melim Almeida (reclamar sco giugadur da reserva). – Corners: 8:6. – 37. siet en la petga da Rölli.