Emprema victoria per Schluein Glion

El siatavel giug da campiunadi ha ei dau l’emprema victoria per Schluein Glion. Suenter la midada sin il post da trenader ha l’equipa mussau ina prestaziun animada cun grond engaschament ed ha meritau quella victoria. Las midadas tacticas dil niev trenader Corsin Cavegn han purtau fretg.

Naven dalla biala entschatta ha Schluein Glion priu il giug enta maun ed ha giugau ord ina defensiun stabila in ballapei spert ed offensiv. Quei ei vegniu remunerau gia ella tschunavla minuta. Tiziano Vinzens ha surpriu la balla cuort avon la lingia da sedisch ed ha cun in siet surprendet e precis el cantun ault sittau il 1:0. Silsuenter ei il giug sulivaus, las meglieras caschuns da marcar han denton vinavon ils giugadurs dall‘equipa da casa giu. Ton Ronny Della Morte sco era Tiziano Vinzens han denton munchentau fetg bunas caschuns d’alzar il resultat. Cuort avon la pausa eis ei lu vegniu ualti dramatic a Crap Gries: igl emprem ha Flurin Capaul impediu cun ina stupenta parada l’egalisaziun entras in siet naven dil punct da penalti ed en la cunterattacca ha aunc inagada Tiziano Vinzens buca dumignau da sittar il 2:0 era sch’el ha saviu cuorer naven da miez il plaz persuls encunter gol. Siu siet ha il goli frenau bravurusamein. Mo ina minuta pli tard ha quei goli sittau la balla sut pressiun exacatamein ad Andri Michel els peis. Lez ha buca schau supplicar ed ha naven da miez il plaz alzau la balla sur il goli en al 2:0.

Egl emprem quart ura suenter pausa ha l’equipa da casa buca saviu mussar la medema prestaziun sco en l’emprema mesadad. Ils hosps han nezegiau quei temps da fleivlezia dils indigens per egalisar il giug. Rilind Shala ha nezegiau ina malcapientscha suenter ina remessa laterala per sittar il 2:1 e Nurkan Ibrahimi ha sittau il 2:2, cun realisar il secund penalti che igl arbitrader ha schulau per St. Margrethen. Tier quei resultat eis ei restau entochen cuort avon la fin. Ils giugadurs da Schluein Glion han denton encuretg entochen alla fin il gol dalla victoria. E quella veglia ei vegnida remunerada. Aron BĂŒchler ha sittau en la novontavla minuta ina flanca liunga naven dalla vart seniastra en la zona da puniziun, leu ha Gian Sgier deviau la balla cul tgau a Serafin Bundi, il qual ha tuschau ella sur lingia en al 3:2.

US Schluein Glion – FC St. Margrethen 3:2 (2:0)

Crap Gries. – 170 aspectaturs. – AR: Aliji

Gols: 5. Vinzens 1:0, 45. Michel 2:0, 49. Shala 2:1, 60. Nurkan Ibrahimi 2:2 (penalti), 90. Bundi 3:2.

Schluein Glion: Capaul; Dermont, Matthias Derungs, Livio Derungs, BĂŒchler; Sgier, Michel, D’Atria ( 76. Gallmann), Bundi; Della Morte (46. TschalĂšr), Vinzens (80. Gomes Machado).

St. Margrethen: Cavalcanti; KĂŒnzler, Rexhepi, Forgia, Bykov; Shoshi (16. Braun, 46. Isuf Ibrahimi), Cetinkaya, Shala, Aliu; Maliqi, Aktas (57. Nurkan Ibrahimi, 73. Gavranic).

Remarcas: Cartas mellnas:  16. Matthias Derungs (foul), 40. Aktas (foul), 75. Maliqi (foul), 84. Gavranic (foul), 85. Bykov (foul).  â€“ Corners: 0:7. – 43. Capaul tegn penalti sittaus da Maliqi.