En in giug senza gronda tensiun piarda Schluein Glion encunter Herisau cun 0:3 senza haver egl entir giug ina concreta caschun da sittar in gol. Mo era igl adversari ha buca giu biaras caschuns, ils gols ha Herisau sittau plitost ord il nuot. Igl emprem cuort avon pausa cun in siet da varga miez il plaz sur il goli en. Exact aschia ha Cristian Tolino era sittau avon quater jamnas in gol a Crap Gries en igl emprem giug da campiunadi da questa sesiun. Il secund gol ei curdaus en la 51avla minuta suenter in pass liung traversal da bi e bein 60 meters sin Joel Kurzbauer, il qual ei mitschaus el dies da siu adversari ed ha battiu il goli da Schluein Glion cun in siet el cantun bass. Il tierz gol la finala ei curdaus cuort avon la fin sin ina flanca dalla vart seniastra, la quala Marco Schmid ha deviau el cantun dretg. Era cheu ha il defensur schau ualti biaras libertads agl attaccader. Pli bia dat ei buca da rapportar da quei giug, sil scret da notizias dil rapportader ei sper quels treis fatgs mo aunc nudau che Murat Leblebici haigi retschiert en la 66avla minuta ina carta mellna per in foul comess.
US Schluein Glion – FC Herisau 0:3 (0:1)
Crap Gries. – 105 aspectaturs. – AR: Lekaj
Gols: 41. Tolino 0:1, 51. Kurzbauer 0:2, 80. Schmid 0:3.
Schluein Glion: Casutt; Frias (88. Mate Lekishvili), Andri Sgier, Gian Sgier; Leblebici, Michel, Livio Derungs, Bundi (46. Stabile), Gomes Machado; Vinzens (59. D’Atria), Dimitri Lekishvili (59. Tschalèr).
Herisau: Rosenfelder; Kurzbauer (71. Huber), Gavrilovic, Dautaj (67. Machado Ramalho), Gomes (67. Schmid); Thönig, Tolino, Bischof, Susic; Müller (67. Yildirim), Ehrbar (78. Loprete).
Remarcas: Cartas mellnas: 66. Leblebici (foul). – Schluein Glion senza Büchler, Gianluca Casutt, Egger, Mathias Derungs, Gallmann (blessai), Capaul (absents). – Corners: 4:8.