En in giug fetg uliv cun fetg paucas caschuns da marcar gols partgan las duas equipas da Schluein Glion e Dardania S. Gagl meritadamein ils puncts. Negina equipa ha meritau da spiarder, negina da gudignar, in remis ei il dretg resultat. Schluein Glion ha mussau ina reacziun sin il giug dalla dumengia vargada encunter Abtwil-Engelburg e mussau che l’equipa sa tener pétg ad in’equipa che ha il medem gi gudignau encunter Domat 5:1. L’entira emprema mesadad han omisduas equipas giu practicamein neginas caschuns da sittar in gol. Tuttina menava Dardania da pausa cun in gol differenza. Cun la davosa attacca eis ei gartegiau a Baskim Redzepi da sittar la balla en la reit, quei cun agid dad in defensur da Schluein Glion che ha deviau siu „chip“ da gol en.
La secunda mesadad entscheiva cun duas schanzas per ils da casa. Ton Dimitiri Lekishvili sco era Linus Tschalèr damognan denton buca la balla en gol. Lekishvili plazzescha in culp cul tgau ord cuorta distanza mo per pauc sper il gol vi e Tschalèr setta la balla el goli suenter che lez haveva piars ella en sia atgna zona da puniziun. In cuort mument pli tard eis ei lu gartegiau a Linus Tschalèr da batter il goli da Dardania. In siet da cantun da Livio Derungs meina el cul tgau en la reit e setta siu secund gol en siu secund giug dapi siu retuorn tier l’equipa da Schluein Glion. Suenter quei gol han las duas equipas puspei neutralisau in l’autra, aschia ch’igl ei restau entochen alla fin tier il resultat da 1:1.
US Schluein Glion – KF Dardania S. Gagl 1:1 (0:1)
Crap Gries. – 155 aspectaturs. – AR: Zeciri
Gols: 45. Rezepi 0:1, 67. Tschalèr 1:1.
Schluein Glion: Capaul; Leblebici (81. Stabile), Matthias Derungs, Gian Sgier, Büchler; Gomes Machado, Michel, Livio Derungs, D’Atria (72. Bundi); Tschalèr (90. Lopes), Lekishvili.
Dardania: Albrecht; Salvatore (53. Nesimi), Himaj, Berisha, Ibrahimi; Estifanos (75. Sutaj), Canoski, Gashi, Sinani (61. Djelassi); Cassani, Redzepi (75. Jakupi).
Remarcas: Cartas mellnas: 59. D’Atria (foul), 70. Lekishvili, Estifanos, Nesimi (tuts per malsportadad). – Schluein Glion senza Gianluca Casutt, Dermont e Egger (blessai), Vinzens + Gallmann (absents). – Corners: 5:5.