Cun ina clara victoria da 4:0 encunter il club da ballapei da Montlingen ha l’equipa da Schluein Glion segirau che il ballapei dalla Surselva ei era representaus el campiunadi 2021/22 en la secunda ligia. L’equipa terminescha il campiunadi scursaniu 2020/21 cun quella tiarza victoria sin il dieschavel plaz dalla tabella cun tuttina bia puncts sco St. Margrethen ed in punct pli bia che Rheineck che vegn relegaus en tiarza ligia ensemen cun l’equipa da Altstätten.
Avon in grond diember d’aspectaturas ed aspectaturs – ei para che biaras e biars han spetgau vess da puspei saver vegnir inagada a Crap Gries e guder in giug – han dus gols avon pausa e dus gols suenter pausa decidiu il giug en favur da Schluein Glion. Quei enuncter in adversari che ha gudiu da saver giugar siu davos giug en Surselva ed ei vegnius cun dus bus plein fans si dalla Vallada dil Rein songagliesa per saver festivar la finiziun dil campiunadi. Quels fans ed ils fans da Schluein Glion han procurau per ina buna atmosfera el stadion ed han motivau il giugadurs da mussar ina buna prestaziun. Ins ha sentiu naven dall’entschatta che l’equipa indigena era empau pli motivada, ella stueva gie era gudignar il giug per aunc haver ina schanza da star en secunda ligia. Aschia ha ella fatg dapli pil giug ed ei ida en la 30avla minuta meritadamein en avantatg. Il giuven attaccader, Sattar Afzali, ei vegnius lantschaus agl ur dalla zona da puniziun, ha cun stupenta tecnica cuglienau dus, treis adversaris e cun saung freid stuschau la balla sper il goli vi en la reit. Quei gol ha dau tschaffen e motivaziun als indigens, aschia ch’els han mo duas minutas pli tard saviu sittar in secund gol. Quella gada ha Livio Derungs pudiu tier la balla sin bien sedisch meters e buca targlinau gitg, mobein sittau ella ferm e precis, la balla ha aunc sdrimau la part endadens dalla petga seniastra, en gol. Quei lu aunc cun siu pei seniester, atgnamein siu pei empau pli fleivels!
Cun quei resultat eis ei iu en la pausa e suenter il té refrestgont ei il giug sesplegaus sco naven dall’entschatta: Schluein Glion ha dominau levamein ed ils giugadurs da Montlingen ein buca gest sescarpai per aunc dar ina midada alla partida. Cun dus gols, in entras Girom Affolter ch’era gest entraus sil plaz ed in penalti da Livio Derungs suenter in foul en la zona da puniziun, ha l’equipa dil trenader Mate Lekischvili decidiu il giug definitivamein. Quella victoria ha schau giubilar giugadurs ed aspectaturas ed aspectaturs. Cunquei che l’equipa da St. Margrethen ha mo giugau pari e l’equipa da Rheineck ha schizun spiars cun 1:3 encunter Arbon eis ei gartegiau a Schluein Glion da vargar quellas duas equipas en la tabella. Quei ei in grond success per quella fetg giuvna equipa, perquei: cordiala gratulaziun a giugadurs, trenaders e tuts funcziunaris. Ei fa plascher d’astgar guder era el proxim campiunadi ballapei da secunda ligia a Crap Gries.
US Schluein Glion – FC Montlingen 4:0 (2:0)
Crap Gries. – 365 aspectaturs. – AR: Ibraimi
Gols: 30. Afzali 1:0, 32. Livio Derungs 2:0, 60. Affolter 3:0, 86. Livio Derungs 4:0 (p.)
Schluein Glion: Hornacek; Dermont, Egger (90. Matthias Derungs), Sgier, Büchler (85. Leblebici); Michel, Livio Derungs, D’Atria (80. Casutt); Vinzens (74. Machado Gomes), Afzali, Zimmermann (59. Affolter).
Montlingen: Wittwer; Bojaxhi, Bont, Wörnhard (46. Büchel), Haltiner; Nando Lüchinger, Klingler (63. Abd El Hai), Meier, Malacrida (46. Niklaas); Istrefi (68. Livio Lüchinger), Gadient (63. Seitz).
Remarcas: Cartas mellnas: 25. Livio Derungs (foul), 57. Nando Lüchinger (foul), 76. Michel (foul), 89. Meier (foul). – Schluein Glion senza Bundi. – Corners: 5:1.