En in giug da gronda impurtonza partenent la relegaziun spiarda l’Uniun Sportiva Schluein Glion encunter Rheineck cun 2:3. Cuort avon la fin ha igl arbiter valetau in’intervenziun dil goli dall’USSI sco foul e schulau penalti, quei suenter ch’igl attaccader haveva stuschau a tiara il defensur e mo aschia vegnius en possess dalla balla. In schul encunter Rheineck fuss plitost stau la dretga decisiun.
Aschia ei l’equipa da Schluein Glion buca vegnida remunerada per sia atgnamein buna prestaziun. Duas gadas ha ella numnadamein egalisau igl avantatg dalla squadra da casa e mussau da gronda calira ina buna morala ed in bien spèrt cumbattiv. Mo lein entscheiver davon. Il giug ha buca entschiet en bein per ils Sursilvans. Gia en la novavla minuta ei l’equipa da casa ida en avantatg cun in culp liber da bien 20 meters distanza. Il siet ha anflau la via atras il mir en il cantun bass dretg e schau giubilar Emin Djelassi per l’emprema gada. Schluein Glion ha duvrau in mument da magunar quella frida, ei lu denton naven dalla 20avla minuta vegnius meglier e meglier el giug e tier bunas caschuns da marcar in gol. Las meglieras han Sattar Afzali e Gian Sgier munchentau. Sattar Afzali ha denton sittau la balla ord cuorta distanza directamein els mauns dil goli indigen e Gian Sgier ha mess siu culp cul tgau per pauc sper il gol vi. Cuort avon pausa eis ei lu tuttina aunc gartegiau d’egalisar il giug. En la 44avla miunta ha il giuven da Domat, Andri Michel, il qual fa siu emprendissadi a Glion ed ha dau oz siu debut en l’equipa sursilvana, mess tut sia forza en in siet da distanza e tuccau da biabein 25 meters la traversa. Dalla traversa ei la balla rebattida el dies dil goli indigen e da leu en la reit.
Era la secunda mesadad entscheiva buca bein per Schluein Glion. Suenter mo duas minutas quenta negin defensur d’esser responsabels per Emin Djelassi, il qual vegn lantschaus sin strusch 20 meters per miez avon il gol e sa naven da leu batter David Hornacek cun in siet el cantun bass dretg. Schluein Glion ha pia puspei stuiu cuorer suenter ad in gol e la giuvna equipa ha fatg quei cun spertas attaccas sur lur pigns e movibels attaccaders. Ils indigens han empruau da frenar quels cun dabia direzia. En la 64avla minuta ei Adrian Zimmermann denton staus memia sperts per siu defensur. El ei mitschaus dall’ala dretga si ed ha sittau la balla ferm e precis davon il gol, nua che Sattar Afzali ha stuschau ella da gol en al 2:2. Quei resultat che fuss staus d’engrau a Schluein Glion valeva era aunc cuort avon la fin, mo lu ei la scena perscretta all’entschatta vegnida! Donn.
L’equipa da Schluein Glion havess cun sia prestaziun meritau da cuntonscher silmeins in remis, muort la terrada eis ella ussa denton curdada sin il secund davos plaz en la tabella e sto haver tema dalla relegaziun. Il davos giug da sonda proxima decida ussa tut. Schluein Glion sto gudignar encunter Montlingen e sperar che Rheineck ni St. Margrethen gudognien buca lur davos giugs, lu savessan quellas equipas aunc vegnir vargadas en la rangaziun. Lein sperar, la speronza miera gie il pli davos!
FC Rheineck – US Schluein Glion 3:2 (1:1)
Stapfenwies, Rheineck. – 135 aspectaturs. – AR: Aggeler
Gols: 9. Djelassi 1:0, 44. Michel 1:1, 47. Djelassi 2:1, 64. Afzali 2:2, 87. Aksic 3:2 (penalti).
Rheineck: Petrov; Lendim Ibrahimi, Akel (46. Aksic), Blendard Ibrahimi (40. Vasic), Imeri, Chiarello (77. Maliqi), Aliu, Lakna (88. Lleshi); Djelassi, Spahiu, Bojaxhi.
Schluein Glion: Hornacek; Dermont, Livio Derungs, Sgier, Büchler; Michel (80. Egger), Bundi, D’Atria, Vinzens (56. Affolter); Rui Gomes (51. Zimmermann), Afzali (83. Leblebici).
Remarcas: Cartas mellnas: 34. Blendard Ibrahimi (foul), 41. Bundi (reclamar), 52. Lendim Ibrahimi (foul), 60. Aksic (malsportadad), 70. Chiarello (foul), 84. Spahiu (foul), 88. Dermont, Büchler, Leblebici (tuts per reclamar). – Schluein Glion senza Matthias Derungs (blessaus). – Corners: 6:3.