L’equipa da Schluein Glion ha spiars la dumengia vargada per la quarta gada en seria ed aschia prolunghiu la cuntinuaziun da resultats negativs. Pèr suenter il 0:2 en 80avla minuta ha l’equipa reagau ed empruau da dar aunc ina midada al giug. PĂ©r dapli che da sittar il gol da consolaziun entras in penalti ha ei denton buca tunschiu.
Ei ha pariu la dumengia a Crap Gries che buca tut ils giugadurs indigens hagien capiu ch’igl ei pusseivel da gudignar in giug da ballapei mo cun cumplein cumbat e cun batter per mintga balla. Cunzun sch’igl adversari secloma Arbon 05 ed ha recaltgau els emprems siat giugs gest mo in punct pli pauc che Schluein Glion. Tuts ils giugadurs dils hosps han numnadamein capiu ch’il giug en Surselva seigi ina partida capitala ed han mussau bia engaschament e spèrt da cumbat. Els han aschia era dominau pli u meins igl entir giug e segiramein buca engulau la victoria. Schabegiau ei denton gitg buca bia sil plaz. Per il rapportader ein en tut cass mo tschun scenas en las entiras novonta minutas stadas dignas da vegnir nudadas sil scret da notizias. En la 55avla minuta ha Arbon 05 giu ina gronda schanza, igl attaccader ha denton tut persuls avon il gol sittau la balla sper la petga seniastra ora. En la 67avla minuta havess Tiziano Vinzens saviu sittar ils indigens en avantatg, el ha denton sin in pass travers buca tuccau la balla endretg, aschia ch’il goli ha saviu tener ella. En la 72avla ed 80avla minuta ein ils dus gols per Arbon 05 curdai entras AndrĂ© Baiao ed Joel Haltinner. Igl emprem suenter in pass falliu el miez dil giug, il secund suenter ina malcapientscha dils dus defensurs centrals da Schluein Glion. En la 85avla minuta ei Tiziano Vinzens vegnius terraus en la zona da puniziun. Igl arbiter ha schulau penalti, il qual Adrian Zimmermann ha nezegiau per sittar igl 1:2. Per dapli ha ei buca tunschiu als indigens. Ussa suondan – sche il coronaviurs lai tier ei – aunc dus giugs avon la pausa d’unviern. Sonda proxima ordvart encunter Rheineck ed ina jamna pli tard encunter Montlingen a casa. En quels dus giugs dat ei nuot auter che cumbatter per mintga balla e per mintga centimeter pastg sil plaz. Ei vala numnadamein da recaltgar puncts per buca curdar sin in plaz da relegaziun. Lein sperar che tut ils giugadurs realiseschien quei sin proxima fin d’jamna.
Tore: 73. Baiao 0:1, 80. Haltinner 0:2, 86. Zimmermann 1:2 (penalti).
Schluein Glion: Hornacek; Dermont, Sgier, Martin Egger, Welter (64. Matthias Derungs); Luca Vinzens (70. Livio Derungs), Bundi, D’Atria; Afzali, Zimmermann, Tiziano Vinzens.
Arbon 05: Wüst; Nesimi, Bont, Tobias Egger, Höhener; Merz (89. Meister), Peric, Altindas, Baiao (84. Mevmedoski), Montinaro (81. Kozarac); Haltinner.
Remarcas: Cartas mellnas: 22. Welter (foul), 45. Baiao (foul), 83. Martin Egger (foul). – Schluein Glion senza Affolter, Büchler, Violi (tuts blessai). – Corners: 4:6.