Neginas schanzas cun la davosa clamada

Senza buca meins che sis giugadurs da tschep ei l’equipa da Schluein Glion vegnida sut las rodas el Principadi dil Liechtenstein ed ha spiars il giug gest cun 0:5. Cunzun en l’emprema mesadad ei la resistenza denton stada fetg mudesta. Strusch in cumbat ei vegnius gudignaus, cunzun el camp central, aschia che l’equipa da casa ha saviu crear in‘attacca suenter l’autra ed alzar il resultat entochen pausa cuntinuadamein.

Cura ch’ils accumpignaders dall’equipa da Schluein Glion han viu ils giugadurs che sescaldavan per dar dumengia suentemiezgi il giug sil plaz sper il Rein a Vaduz han ei schminau ch’ei vegni buca sempel encunter las reservas dil club dalla Super League. Quellas fagevan numnadamein gia da cuorer en la pareta dad esser ualti cargadas e motivadas, capeivel sch’il schef da sport dalla emprema equipa, Franz Burgmeier, ei sco aspectatur agl ur dil plaz. E sempel eis ei lu era buca vegniu. L’equipa indigena ha priu il giug dalla bial’entschatta enta maun, ha dominau, gudignau bunamein mintga cumbat e sittau entochen pausa tschun gols. Treis gadas ha Dejan Dokic battiu il goali da Schluein Glion e duas gadas Yago Gomes. Quels dus giugadurs han segiramein fatg empau reclama per sesez tier il schef da sport, els saudan era omisdus tier il cader dall’emprema equipa.

Il giug ei pia staus decidius gia da pausa, aschia che tut ei vegniu en la secunda mesadad pli ruasseivel. Vaduz 2 ha schau suenter empau, Schluein Glion ha era entschiet a dar bal e gudignar cumbats cun il resultat ch’il giug ei vegnius pli ulivs. Pli che dus siets da distanza che han pretendiu in’intervenziun dil goli indigen ei denton buca reussiu als Sursilvans. La defensiun ha persuenter giu meglier enta maun ils attaccaders e strusch schau tier pli grondas caschuns da marcar. Positiv ei segir  che l’equipa ha mussau en la secunda mesadad ina reacziun ed ha cumbattiu cun dapli engaschament.

FC Vaduz 2 – US Schluein Glion 5:0 (5:0)

Rheinpark, Vaduz. – 100 aspectaturs. – AR: Weber

Gols: 2. Dejan Djokic 1:0, 24. Dejan Djokic 2:0, 26. Gomes 3:0, 31. Dejan Djokic 4:0, 41. Gomes 5:0.

Vaduz 2: Gabriel Foser; Leka, Capozzi, Marxer; Netzer (50. Aliji), Giorlando, Gomes, Matti Foser (50. Bajrami; Tiganj (46. Topalli), Dejan Djokic (76. Sascha Djokic), Saglam (72. Behluli).

Schluein Glion: Hornacek; Dermont, Livio Derungs, Egger, Sergio Welter; Luca Vinzens, Silvan Welter, D’Atria, Tiziano Vinzens (72. Cabalzar); Affolter (48. Della Morte), Zimmermann (80. Neves Lopes).

Remarcas: Cartas mellnas: neginas!  – 24. siet en la petga Vaduz 2. – Schluein Glion senza Bundi (serraus), Sgier (absents), Matthias Derungs, Violi (blessai), Afzali, Büchler (malsauns). – Corners: 5:2.