Schluein Glion piarda il giug el davos quart ura

Atgnamein haveva Schluein Glion aunc cuort avon la fin tut ils trumfs enta maun per gudignar il giug encunter Au-Berneck 05. Ina carta mellen/cotschna ha denton mess tut sil tgau. Cun in um dapli sil plaz han ils hosps priu il giug enta maun, sittau el davos quart ura dus gols ed aschia gudignau il giug.

Mo treis gis suenter il giug plitost malgartegiau encunter il FC Altstätten ei l’equipa da Schluein Glion gia puspei stada il margis sera sil plaz ed ha giugau encunter in’ulteriura equipa dalla vallada dil Rein, numnadamein il FC Au-Berneck 05. E Schluein Glion ha reagau sil giug dalla sonda vargada cun mussar ina prestaziun bienton pli animada, silmeins en las empremas siatonta minutas. Entochen pausa han denton ton ils patruns casa sco era ils hosps buca giu grondas caschuns da marcar in gol. Quei ei semidau cuort suenter il té. Gia en la 49avla minuta ei Adrian Zimmermann vegnius tarmess cun in pass en la profunditad en la zona da puniziun. Siu siet ha il goli buca saviu frenar, mobein mo menar dalla vart, nua che Sattar Afzali spitgava ed ha sittau la balla en la reit. Quei gol ha fatg vegnir l’equipa indigena pli segira ed ella ha giu in bien mument giug ed adversari enta maun. Quei ei semidau suenter bien ina ura. Enteifer mo duas minutas ei Serafin Bundi vegnius admonius digl arbiter duas gadas ed ha ord consequenza stuiu bandunar il plaz. Suenter quella frida per l’equipa da casa ha Au-Berneck 05 surpriu il domini e bien diesch minutas pli tard ha il trenader dils hosps midau en dus novs attaccaders e cunquei la victoria. In da quels, Emir Muratoski, ha numandamein suenter gest ina minuta sittau l’egalisaziun cun sia emprema frida sin la balla. Quei gol ha rut tut il slontsch als giugadurs da Schluein Glion, aschia ch’ils hosps han mo treis minutas pli tard saviu sittar in secund gol e decider il giug. Marcau il gol ha Emin Djelassi ch’ei marschaus atras la defensiun sco atras pischada ed ha sittau la balla el tschiel dalla reit. Mo en diesch ha Schluein Glion buca giu la forza da reagar e dar aunc inagada ina midada al giug, aschia che quel ei ius a fin cun in’ulteriura terrada insumma buca necessaria. Sco gia la davosa sonda han muncau empau il cletg, empau la perschuasiun e detschartadad da vuler gudignar, empau la curascha e la finala segir era aunc empau la forza alla fin dil secund giug enteifer treis gis. 

US Schluein Glion – FC Au-Berneck 05 1:2 (0:0)

Crap Gries. – 165 aspectaturs. – AR: Kilic

Gols: 49. Afzali 1:0, 77. Muratoski 1:1, 80. Djelassi 1:2.

Schluein Glion: Hornacek; Dermont (69. Violi), Camenisch, Egger, Büchler (77. Welter); Luca Vinzens, Bundi, D‘Atria, Affolter; Afzali, Zimmermann (69. Livio Derungs).

Arbon 05: Jung; Niederl (79. Muratoski), Pirabakaran Purusoththaman, Kriebel, Sarujan Purusoththaman; Zuvic, Tobias Dierauer (79. Büyüktunalioglu), Telatin, Djelassi (90.+ 3. Bekjiri); Yilmaz (90.+ 2. Fabian Dierauer), Baklanovas (64. Marino).

Remarcas: Cartas mellnas: 31. Dierauer (foul), 55. Kriebel (foul), 63. Bundi (foul), 75. Telatin (reclamar).  – Carta mellen/cotschna: 65. Bundi (foul). – Schluein Glion senza Matthias Derungs e Tiziano Vinzens (blessai), Sgier (absents). – Corners: 3:2.