Encunter il davos en la tabella eis ei buca reussiu a Schluein Glion da gudignar in giug ch’ei staus varga in’ura ualti lungurus. La finala ha in penalti, schulaus silmeins ord vesta dallas aspectaturs ed aspectaturs indigens empau dubius decidiu il giug en favur dils hosps d’Altstätten che han aschia saviu recaltgar ils emprems puncts el campiunadi 2020/21.
Sur dall’emprema mesadad dat ei buca bia da raquintar. Ils hosps han sittau suenter siat minutas cun bien agid dalla defensiun sursilvana in gol entras Adis Hujdur. El ei vegnius lantschaus cun ina flanca ord il miez, ha astgau controllar la balla en la zona da puniziun e sittar ella precis el cantun bass. Pli bia ei buca schabegiau entochen pausa. Per cun midar en igl attaccader Sattar Afzali suenter 62 minutas ha il giug survegniu empau colur ed emoziuns. Strusch sil plaz ha il giuven dall’annada 2004 numnadamein sittau siu emprem gol per l’emprema equipa dall’USSI. Suenter in pass travers da dretg ha el surpriu la balla sin la lingia da sedisch e marcau in gol cun in siet precis el cantun bass seniester. Quell’egalisaziun ha dau curascha als indigens, in sbagl en la defensiun ha denton schau ir ils hosps per la secunda gada en avantatg. Vulent baghegiar si il giug ha in defensur numnadamein piars la balla a siu adversari, lez ha surviu Fisnik Berisha che spitgava avon il gol ed ha saviu encurir ora il cantun. Sin quella frida reaghescha Schluein Glion cun buna morala e setta mo quater minutas pli tard il 2:2 entras Martin Egger. Al defensur ei ina balla rebattida curdada avon il peis ed el ha sittau quella cun perschuasiun en la reit. Ussa han ils biars presents supponiu ch’il giug mundi a fin cun in remis, quels han denton buca quintau cun ils umens en ner. En la 82avla minuta schula igl arbiter in penalti suenter in cumbat, el qual plitost igl attaccader d’Altstätten fa il foul e buc il defensur. Aschia sa Kevin Steiger marcar il 2:3 e francar ils emprems puncts per sia equipa, era perquei che il 3:3 sittaus cuort avon la fin entras Gian Sgier vegn annullaus muort ina posiziun d’ordgiug. Memia anavon steva denton buca Sgier, mobein in auter giugadur indigen! L’equipa dil trenader Mate Lekisvhili ha aschia piars encunter in adversari che fuss en tut cass staus da batter, mo aschia ei il ballapei. Ei dat nuot auter che emblidar spert quei giug, margis proxim dat l’equipa numnadamein gia puspei in giug da campiunadi. Puspei a casa, quella gada secloma igl adversari Au-Berneck 05 ed il giug entscheiva la sera allas 20:15 uras a Crap Gries.
US Schluein Glion – FC Altstätten 2:3 (0:1)
Crap Gries. – 235 aspectaturs. – SR: Kammerer.
Tore: 7. Hujdur 0:1, 66. Afzali 1:1, 72. Berisha 1:2, 76. Egger 2:2, 83. Steiger 2:3 (penalti)
Schluein Glion: Hornacek; Dermont, Matthias Derungs (46. D’Atria), Egger, Büchler; Luca Vinzens, Sgier, Bundi, Violi (62. Afzali); Affolter (76. Dimitri Lekishvili), Zimmermann.
Altstätten: Mirel Eugster; Walt (77. Göldi), Simon Eugster, Simon Lichtenstern, Lüchinger; Liiro, Ergens (50. Babic), Daniel Lichtenstern, Berisha (86. Bösch); Steiger, Hujdur.
Remarcas: Cartas mellnas: 44. Berisha (foul), 75. Eugster (foul), 82. Sgier (foul), 84. Daniel Lichtenstern (foul), 90.+ 4. Afzali (reclamar). – Schluein Glion senza Tiziano Vinzens (blessaus), Livio Derungs e Sergio Welter (malsauns). Corners: 4:1.