El tierz giug ordvart da questa sesiun gudogna Schluein Glion per l’emprema gada ordvart. El principadi dil Lichtenstein batta l’equipa sursilvana Ruggell cun 2:1.Il gol da victoria ei curdaus per en la 93avla minuta suenter in corner entras in culp cul tgau dil defensur SerGian Ramos.
Varga siatonta minutas ha l’equipa das Schluein Glion astgau giugar la dumengia encunter 10 umens, cunquei che Agim Zeciri, forsa il pli ferm giugadur da Ruggell, ha survegniu mussau duas cartas mellnas en la medema minuta ed ha en consequenza stuiu bandunar il plaz. El ha buca saviu schar star da sittar la balla da gol en suenter che igl arbiter haveva giu schulau in ordgiug. Cura ch’igl arbiter ha mussau ad el pervia da quei la carta mellna, ha el era buca saviu schar star d’applaudir, aschia ch’igl ei restau agl um en ner nuot auter che da tarmetter il versau attaccader da Ruggell en cabina. Da quei temps menava Schluein Glion gia cun in gol differenza. Suenter tschun minutas ei Adrian Zimmermann numnadamein vegnius lantschaus da Tiziano Vinzens en la profunditad ed ha battiu il davos um dils da casa cun in siet plazzau el cantun bass. Entochen pausa ha Schluein Glion silsuenter pli u meins dominau il giug mo munchentau da sittar in secund ni tierz gol ed aschia decider il giug.
Suenter il tè da pausa ein ils indigens vegni ualti cargai anavos sil plaz. Els han fatg ferma pressiun ed immediat giu success. Stefan Maag ei mitschaus dalla vart seniastra alla defensiun ed ha anflau cun sia flanca Constantin Marxer, il qual ha saviu frenar la balla e plazzar ella senza difficultads en la reit. Suenter quell’egalisaziun han ils da casa empruau da dominar era cun in um pli pauc il giug. Quei ei denton gartegiau mo a mesas ed era Schluein Glion ha buca saviu prender il giug enta maun. Aschia che las aspectauras ed ils aspectaturs han viu dabia acziuns malgartegiadas. Cura che tuts ils presents quintavan ch’il giug mondi a fin cun in remis ha Schluein Glion aunc astgau sittar siu secund corner. E quel ha SerGian Ramos plazzau cun in bi siet cul tgau el cantun bass dretg ed aschia decidiu il giug. Quels treis puncts fan segir bein all’equipa dalla Surselva che ha ussa siat puncts sin siu conto ed astga ussa dar dus giugs a casa, sonda proxima encunter Au-Berneck 05 ed en duas jamnas encunter Altstätten.
FC Ruggell – US Schluein Glion 1:2 (0:1)
Widau. – 180 aspectaturs. – SR: Zürcher.
Tore: 5. Zimmermann 0:1, 47. Constantin Marxer 1:1, 90.+3. Ramos 1:2.
Ruggell: Haselwanter (90.+5. BĂĽchel); Alexander Marxer (27. Pavicic), Hasler (27. Dukac), Maag, Seemann; Kollmann, Ritter, Haas, Andrade; Zeciri, Constantin Marxer (62. Meier).
US Schluein Glion: Hornacek; Brasser (7. Egger), John Hempa, SerGian Ramos, Welter (79. BĂĽchler); Luca Vinzens, Dermont (62. Cabalzar), Livio Derungs, Tiziano Vinzens (44. Bundi); Afzali, Zimmermann.
Remarcas: Cartas mellnas: 19. Zeciri (sittar naven la balla), 42. Seemann (foul), 58. Livio Derungs (foul), 90.+1. Ritter (foul), 90.+3. Pavicic + Zimmermann (malsportadad) – Carta mellen/tgietschen: 19. Zeciri (applaudir). – Corners: 3:2.