Naven dalla biala entschatta ha igl adversari si dalla vallada dil Rein surpriu il domini dil giug e strusch schau ina pusseivladad a Schluein Glion da vegnir malsegirs avon igl gol. Aschia ei la victoria da Rorschach-Goldach segir meritada, il resultat havess aunc saviu esser pli clars.
Suenter la buna prestaziun dalla sonda vargada encunter St. Margrethen ein puspei numerusas aspectaturas e numerus aspectaturs vegni a Crap Gries per mirar sche Schluein Glion possi era gudignar siu secund giug a casa enteifer quater gis. Mo quella gada eis ei vegniu tut auter. La ton corporalmein sco tecnicamein ferma equipa da Rorschach-Goldach ei stada naven dall’entschatta entochen la fin la megliera equipa sil plaz e ha gudignau meritadamein il giug, era en quella altezia. Als giugadurs da Schluein Glion ha buca bia vuliu gartegiar. Strusch ina cumbinaziun, biars pass falli e biars cumbats piars ein stai da veser duront il giug entir. Era il sittar gols ei stau per Rorschach-Goldach nuota aschi grev. Pil pli ha numnadamein in ni plirs giugadurs indigens dau in pass falliu ni piars la balla ed aschia envidau ils hosps d’encurir ora il cantun ed aschia batter il goli senza cumpassiun. Surpredent ch’il trenader dils hosps ha en la 73avla minuta, cura che sia equipa menava cun treis gols avantatg, buca saviu schar da gir aviras agl assistent digl arbiter, aschia ch’el ha survegniu mussau la carta cotschna ed ha stuiu bandunar il plaz!
US Schluein Glion – FC Rorschach-Goldach 17 0:4 (0:2)
Crap Gries. – 210 aspectaturs. – AR: Berisa
Gols: 20. Adrian Morina 0:1, 41. Jung 0:2, 58. Acklin 0:3, 81. Acklin 0:4.
Schluein Glion: Hornacek; Dermont, Matthias Derungs, Egger (81. Casutt), Welter; Sgier, Bundi, Livio Derungs (74. D’Atria), Luca Vinzens; Affolter (79. Cabalzar), Zimmermann.
Rorschach-Goldach: Babic; Yves Baumann, Patrice Baumann, Niklaus, Jung; Bosshart, Lovric (65, Aribor Morina), Wagner da Silva (63. Canoski), Morina (62. Haag); Meister (39. Acklin), Oliver Baumann (83. Di Benedetto).
Remarcas: Cartas mellnas: 16. Oliver Baumann (reclamar), 26. Dermont (foul), 34. Meister (foul), 48. Bosshart (reclamar), 60. Bundi (foul), 65. Zimmermann (reclamar). – Carta cotschna: Sager (trenader, inguria arbiter assistent). – Corners: 5:8. – 13. siet en la traversa (Oliver Baumann), 49. Culp liber en la traversa (Adrian Morina). – Schluein Glion senza Afzali, Büchler, Tiziano Vinzens e Violi (tuts blessai).