Schluein Glion memia pauc efficients avon il gol

Las schanzas per far gols ein stadas avon maun, il saung freid ha denton muncau als giugadurs da Schluein Glion avon il gol. Tut auter ils giugadurs da Romanshorn, or da forsa sis schanzas han ei fatg quater gols ed aschia decidiu igl emprem giug da campiunadi claramein cun 4:0.

Sco avon in onn ei Schluein Glion serendius a Romanshorn sper il lag Bodan per dar igl emprem giug da campiunadi. Ed il giug ei era staus fetg semeglionts sco il giug digl onn vargau. Romanshorn ha empruau da vegnir al success cun ballas liungas ord la defensiun, Schluein Glion ha encuretg sia fortuna cun spertas cunterattaccas. Omisduas equipas ein all’entschatta denton strusch vegnidas malsegiras avon il gol. Ei ha duvrau in sbagl da Schluein Glion enten baghegiar si per schar sittar ils indigens entras Edonat Sadiki per l’emprema gada sin gol e gest marcar il 1:0. Era il secund gol entras Manuel Keller ei curdaus plitost surprendentamein, ina balla rebattida ei numnadamein curdada agl attaccader gest avon ils peis, aschia ch’el ha saviu stuschar ella en la reit. Entochen pausa ei Schluein Glion strusch vegnius da reagar sin quei dischavantatg. Ina buna schanza ha l’equipa dil niev trenader Mate Lekishvili denton giu per marcar il gol. Luzi Dermont ei vegnius lantschaus cun in pass en la profunditad ed ha vuliu sittar la balla bass sper il goli vi en la reit, il goli ha denton reagau fetg bein e spert e deviau la balla.

Suenter pausa han ils aspectaurs viu pli u meins il medem giug sco all’entschatta mo che Schluein Glion fageva ussa dapli pressiun. Ina malprecautaziun ha lu denton schau sittar Manuel Keller siu secund gol ed alzar il resultad sin 3:0. El ei vegnius lantschaus suenter ch’in giugadur da Schluein Glion ha piars la balla cun in pass liung ed ha pigliau David Hornacek ch’ei vegnius empau nunmotivadamein ualti lunsch ord da gol cun alzar la balla sur el en. Suenter quella frida han ils Sursilvans empruau aunc pli vehement da vegnir al success. Els han lu era creau pliras bunas schanzas mo ton Serafin Bundi  sco era Sattar Afzali  han buca dumignau la balla ord cuorta distanza sur lingia en. Serafin Bundi ha tuc cun siu siet directamein il goli da Romanshorn e Sattar Afzali ha sittau la balla ord cuorta distanza sur gol ora. In siet direct da Serafin Bundi ei per tut discletg lu era aunc curdaus sin la traversa enstagl en gol, aschia ch’ils indigens han cun la davosa attacca sittau entras Fabio Pfomann il 4:0 e fatg tut clar. Els han segir gudignau meritadamein, la victoria ei denton per in ni dus gols memia aulta.

FC Romanshorn – US Schluein Glion  4:0 (2:0)

Weitenzelg. – 105 aspectaturs. – AR: Musliu.

Gols: 14. Sadiki 1:0, 27. Keller 2:0, 61. Keller 3:0, 90.+3. Pfomann 4:0.

Romanshorn: Marolf; Häberli (60. Senn), Lang, Ajvazaj, Lieberherr; Idrizi (82. Krasniqi), Spindler, Sadiki (70. Länzlinger), Keller (77. Wiedermann); Zanetti (64. Pfomann), Zinnà.

Schluein Glion: Hornacek; Egger, Matthias Derungs, Sgier, Büchler (73. Afzali); Livio Derungs, Luca Vinzens, D’Atria (64. Bundi), Tiziano Vinzens, Dermont (87. Welter), Zimmermann (87. Cabalzar).

Remarcas: Cartas mellnas: 75. Egger, 82. Ajvazaj (omisdus pervia da fouls). – 80. Siet sin la traversa Schluein (Bundi).  – Schluein Glion senza Violi (blessaus). – Corners: 3:4.