Munchentau pliras excellentas caschuns da marcar il gol da victoria

Encunter il davos dalla tabella, Rheineck, ha Schluein Glion vuliu terminar la sesiun cun ina victoria. Quei ei denton buca gartegiau. La cuolpa ei la sgarscheivla innocenza avon il gol digl adversari stada, quei en special il davos quart ura avon la pausa, nua che buca meins che treis excellentas caschuns da marcar ein vegnidas munchentadas.

En in giug uliv denter duas equipas che havevan omisduas basegns da recaltgar ulteriurs puncts eis ei gartegiau en la 20avla minuta alla equipa da casa dad ir en avantatg. Igl attaccader Raphael Bucheli ei vegnius lantschaus en l’ala dretga. El ha cuglienau siu adversari che ha buca gest fatg la megliera figura en quei cumbat um encunter um e plazzau la balla via la partsut dalla traversa en la reit. La reacziun da Schluein Glion sin quei gol ei stada buna. Enteifer mo duas minutas eis ei numnadamein gartegiau d’egalisar il resultat. Responsabel per l’egalisaziun ei il trenader-giugadur, Alessandro Giacomelli, staus. El ei vegnius lantschaus en la zona da puniziun da Serafin Bundi, ha medemamein cuglienau siu adversari e stuschau la balla cun saung freid da gol en. Muort la munconza digl attaccader Lars Caduff ha il giugadur-trenader surpriu la posiziun da tal e mussau ch’el sa aunc adina nua ch’il gol stat. Suenter l’egalisaziun ha Schluein Glion surpriu pli e pli il domini dil giug ed havess entochen pausa era saviu decider tal. Treis gadas havessan ils attaccaders schizun stuiu sittar in gol. Mo tuttas treis aschinumnadas „100procentas“ schanzas ein vegnidas munchentadas, aschia che las duas equipas ein idas cun il resultat da pari en la pausa.
Suenter il té ha vinavon Schluein Glion fatg il giug. L’equipa da casa ei plitost seconcentrada sin cunterattaccas. A Schluein Glion eis ei denton buca gartegiau da scaffir en retscha aschi bunas caschuns da realisar sco avon la pausa, cun in excepziun. Diesch minutas avon la fin ei Xenon Truffer, ch‘era cuort avon vegnius midaus en, vegnius survius en la zona da puniziun. El ha cuglienau il goli da Rheineck ed havess mo aunc stuiu tuschar la bala sper il defensur vi che steva sin la lingia da gol. El ha denton buca stuschau la balla mo sper il defensur vi, mobein era sper il gol vi aschia ch’igl ei restau entochen alla fin tier il resultat da 1:1.
Cun quei sulet punct terminescha Schluein Glion la sesiun sin il 10avel plaz, in plaz che muntass la relegaziun. Quei ei segir buca gest empermettend, bien ei denton ch’il sisavel dalla tabella ha mo dus puncts dapli sil conto. Primavera ei pia aunc tut pusseivel. L’equipa ha recaltgau 11 puncts ord ils 11 giugs dalla prerunda. Ils giugs encunter ils dus emprems dalla tabella ha Schluein Glion gudignau, els giugs encunter las empau pli fleivlas equipas eis ei denton entginas gadas buca gartegiau da mussar la prestaziun giavischada. Quei sto vegnir midau primavera sche l’equipa vul era dar il proxim campiunadi en la secunda ligia. La qualitad da far quei ei segir avon maun en l’equipa.

FC Rheineck – US Schluein Glion 1:1 (1:1)

Stapfenwies. – 95 aspectaturs. – SR: Eicher.

Tore: 20. Bucheli 1:0, 22. Giacomelli 1:1.

Rheineck: Petrov; Baumann, Di Gregorio, Maliqi, Blendard Ibrahimi; Nikolics, Blerim Ibrahimi, Bucheli, Imeri (84. Bairami); Hoxhaj, Lleshi (88. Raimondi).

Schluein Glion: Hornacek; Dermont, Matthias Derungs, Routek, Welter; Bundi, Livio Derungs, Cavegn, Luca Vinzens (71. Truffer); Tiziano Vinzens, Giacomelli.

Remarcas: Cartas mellnas: 76. Blendard Ibrahimi (sittar naven la balla). – Schluein Glion senza Caduff (serraus), Gilian (blessaus). – Corners: 4:4.