Suenter ina buna entschatta cun dus gols enteifer las empremas vegn minutas ha Schluein Glion buca dumignau da purtar treis puncts a casa. In gol suenter in penalti schenghegiau e suenter in siet da cantun ha purtau ad Altstätten il remis. Cun la prestaziun dalla secunda mesadad ha l’equipa dalla vallada dil Rein denton era meritau in punct.
Muort differentas absenzas ha il trenader Alessandro Giacomelli stuiu far in per midadas en la defensiun. Aschia ha el sez giugau en quest campiunadi per l’emprema gada sco defensur central e dalla vart seniastra en la defensiun ha el dau fidonza al giuven Aron Büchler che ha duront il giug entir mussau ina buna prestaziun. Era amiez ha il trenader dau fidonza ad in giuven giugadur, numnadamein Raffaele Airaghi. E quei giuven ha remunerau quei mussament da fidonza cun sittar siu emprem gol en secunda ligia. En la dudischavla minuta ha el insistiu en sia moda agressiva ed ha saviu recaltgar e defender la balla dalla defensiun indigena e cuorer persuls encunter gol. Cun in siet plazzau sper il goli vi ha el marcau suveran il 0:1. Cuort pli tard eis ei aunc vegniu meglier per Schluein Glion. Cun ina bellezia midada sur igl entir plaz vi ei Tiziano Vinzens vegnius lantschaus en l’ala seniastra. Lez ha viu che Lars Caduff ei curius en ideala posiziun avon il gol ed ha surviu ad el la balla sil pei per sittar il 0:2.
Ils da casa han reagau sin quei secund gol ed empruau cun dar empau pli offensiv. Cun ballas liungas sin igl attaccader Ramon Gächter, han ei empruau da surmontar la defensiun dils hosps. Quei ei denton gartegiau mo malamein. Strusch inagada en las empremas quronta minutas eis ei vegniu prigulus avon il gol da Schluein Glion. Lu ha igl arbiter gidau ils indigens. In culp liber datier dalla bandiera da cantun ha Kevin Steiger sittau el sulet um che fageva in mir e tuc tal el bratsch che era denton stretg vi dil tgierp. Igl arbiter ha tuttina taxau quei sco in foul da maun, quei denton senza ughegiar da dar al giugadur in carta mellna (?), ed ha schulau penalti. Donn ch’ei dat buca il VAR en secunda ligia! Quei penalti ha purtau il 1:2 cuort avon pausa.
Il gol ha dau ad Altstätten curascha per la secunda mesadad. L’equipa ha fatg dabia pressiun cun bia ballas liungas e cun bia ballas aultas en la zona da puniziun. Ina da quellas ballas aultas ha lu era purtau il gol da pari. Suenter in siet da cantun ei Ramon Gächter siglius il pli ad ault ed ha sittau la balla cul tgau en la reit. L’equipa da Schluein Glion ei duront la secunda mesadad buca vegnida tier biaras grondas pusseivladads da sittar in gol. Bein ha la squadra empruau da vegnir cun spertas cunterattaccas al success, mo il davos pass – pia il decisiv pass – ei maina gartegiaus bein. Aschia eis ei restau entochen alla fin tier il resultat da pari. In punct egl gliester ei bein bien, mo cun empau dapli precisiun ed saung freid fuss ei forsa schizun gartegiau da purtar tut ils treis puncts si da S. Gagl.
FC Altstätten – US Schluein Glion 2:2 (1:2)
GESA. – 225 aspectaturs. – SR: Aiji.
Tore: 12. Airaghi 0:1, 19. Caduff 0:2, 40. Steiger 1:2 (pen.), 69. Gächter 2:2.
Altstätten: Dietsche; Göldi, Moser, Ritter, Eugster (45. Simon Lichtenstern); Liiro (74. Ergens), Bösch, Daniel Lichtenstern, Streule (90. Savanovic); Steiger (82. Kuster), Gächter.
Schluein Glion: Hornacek; Welter, Matthias Derungs, Giacomelli, BĂĽchler; Truffer (61. Luca Vinzens), Livio Derungs, Cavegn, Airaghi (73. Bundi); Tiziano Vinzens, Caduff.
Remarcas: Cartas mellnas: 38. Airaghi (foul), 39. Steiger (reclamar), 51. Büchler (maun). – Schluein Glion senza Dermont, Gilian, Gomes Machado e Routek (tuts egl exteriur). – Corners: 5:3.