Suenter duas victorias ha l’equipa Schluein Glion puspei stuiu ir senza puncts giu dil plaz. Cun la prestaziun da sonda sera ha l’equipa denton era meritau negins puncts. Pass falli e malcapientschas han dominau naven dall’entschatta entochen la fin, aschia ch’ils hops d’Au-Berneck 05 ein vegni da gudignar tgunschamein.
Gia suenter sis minutas havessan ils hosps saviu ir en avantatg. Igl emprem ei ina flanca da Rilind Shala setschentada sin la traversa e mo in pign mument pli tard ei Nurkan Ibrahimi marschaus atras la defensiun centrala sco atras pischada. Mo muort ina parada excellenta da David Hornacek sil siet ord cuorta distanza digl attaccader han ils indigens buca incassau en quella situaziun in gol. En la 14avla minuta ha Schluein Glion giu sia megliera caschun da marcar. Lars Caduff ha diregiu la balla cun il culp liber sur il mir ora en direcziun dil cantun ault dretg. La balla ei denton buca setschentada en la reit mobein vid la traversa, il goli havess giu neginas schanzas da tener quei siet. La proxima attacca ha lu purtau il gol d’avantatg ad Au-Berneck 05. Dus giugadurs da Schluein Glion han buca impediu in attaccader dils hosps da sittar ina flanca naven dalla vart dretga en la da sedisch a Rilind Shala che spitgava da l’autra vart ed ha cun in ferm siet direct el cantun ault sittau il 0:1. Quei gol ha buca destadau il indigens. Anzi, Au-Berneck 05 ha vinavon astgau profitar da massa pass falli e sbagls tecnics buca exnum usitau dils giugadurs indigens ed aschia controllau il giug entochen pausa.
Il trenader da Schluein Glion, Alessandro Giacomelli, ha reagau e midau ora dus giugadurs da miez da pausa. Il giug dils indigens ei perquei denton buca vegnius megliers. La buna veglia da dar ina viulta al giug ei bein stada avon maun, mo ei ha buca vuliu gartegiar, cunquei che la quota da pass falli ei vinavon stada fetg aulta. Aschia ha in pass falliu ord la defensiun era schau sittar ils hosps il 0:2. Mergim Osmani ei vegnius lantschaus da Nurkan Ibrahimi – che ha retschiert il pass sbagliau – ed ha persuls avon il goli buca schau schanza a quel. Ella davosa mesa ura ha Schluein Glion lu fatg pulita pressiun per silmeins aunc sittar in gol ni forsa schizun saver egalisar il resultat. L’equipa ei era vegnida tier in per bunas caschuns, denton senza reussir. Da l’autra vart ha Au-Berneck 05 era giu cun entginas cunterattaccas la pusseivladad d’alzar il resultat. Cheu ha denton il goli da Schluein Glion – practicamein il sulet giugadur indigen che ha mussau la prestaziun usitada – mess en il veto e teniu plirs siets cun bunas paradas.
Quei giug vala ei d’emblidar aschi prest sco pusseivel. Sche l’equipa vul recaltgar puncts sto ella giugar sempel e precis. Mintga giugadur sto dar breigia e giugar concentrau senza firlefanzas. La proxima caschun da mussar ch’ei san far quei suonda proxima mesjamna sera el giug da Cup svizzer encunter Rüthi.
US Schluein Glion – FC Au-Berneck 05 0:2 (0:1)
Crap Gries. – 192 aspectaturs. – AR: Lekaj
Gols: 15. Shala 0:1, 53. Osmani 0:2.
Schluein Glion: Hornacek; Dermont, Matthias Derungs, Routek, Welter (86. BĂĽchler); Luca Vinzens (46. Truffer), Livio Derungs, Cavegn, Gillian (46. Bundi, 84. Gomes Machado); Tiziano Vinzens (46. Airaghi), Caduff.
Au-Berneck 05: Jung; Roth, Hajrullahu, Purusoththaman Pirabakaran, Schwendener; Riedeberger, Shala, Vujinovic (68. Muratoski), Osmani (77. Dierauer), Nurkan Ibrahimi; Lendim Ibrahimi (84. Sarujan Pirabakaran).
Remarcas: Cartas mellnas: 45. Riedeberger (foul) e Gillian (?), 47. Hajrullahu (foul), 50. Livio Derungs (foul), 81. Purusoththaman Pirabakaran (foul), 87. Shala (foul), 90. + 1. Matthias Derungs (foul). – 6. Flanca sin la traversa da Shala; 14. culp liber en la traversa da Caduff. – Corners: 4:5.