Emprema victoria egl jester per Schluein Glion

El tierz giug ordvart da questa sesiun gudogna Schluein Glion ils emprems puncts. El principadi dil Lichtenstein batta l’equipa sursilvana Ruggell cun 3:2. Tut ils treis gols van puspei sil quen dil caposettagols Lars Caduff. Il gol da victoria ei curdaus en la novontavla minuta!

Suenter la victoria dalla davosa fin d’jamna encunter St. Margrethen ha trenader Alessandro Giacomelli entschiet il giug a Ruggell exact cun ils medems giugadurs. E quels giugadurs ein vegni all’entschatta ualti sut pressiun dalla equipa indigena. Sut la bitgetta da Medin Murati ord il miez dil plaz e digl attaccader Agim Zeciri han ils hospitaders creau pliras caschuns da sittar sin gol. Cun lur siets han ei denton buca tuccau la mira ni che David Hornacek, il ferm goli da Schluein Glion, ha mussau bunas paradas e bloccau la balla. Cuort avon la fin dalla emprema mesa ura eis ei lu stau ils hosps ch’ein i en avantatg. Igl emprem ha igl arbiter schulau in foul cul maun empau baul, la balla ei numandamein ruclada tier Lars Caduff e lez ei curius persuls encunter gol e ha sittau la balla en la reit. Enstagl il 0:1 ha ei denton dau in culp liber per Schluein Glion ord ina buna posiziun. Lars Caduff ha tschentau la balla e sittau ella bass e precis sper il mir vi el cantun. Pia tuttina 0:1. Cura che tuts spitgavan lu da gronda calira sil schul da pausa, ei igl 1:1 lu tuttina aunc curdaus. Schluein Glion ha piars nunsfurzadamein la balla amiez il plaz ed ils indigens han lantschau Medin Murati sur pliras staziuns en ina buna posiziun avon il gol e quella gada ha el buca munchentau la mira.
Suenter pausa ei il giug vegnius pli ulivs. Ruggell ha tuccau en la 56avla minuta mo la petga, schiglioc denton buca pli dominau sco en l’emprema mesadad. Schluein Glion ha instradau en quella fasa pliras bunas attaccas. Ina ha purtau fretg: Tiziano Vinzens ei vegnius lantschaus da Livio Derungs dalla vart seniastra, ei curius en direcziun dil gol ed ha el davos mument tuschau la balla travers a Lars Caduff che ha marcau siu secund gol en quei giug. Sin quella frida ha il trenader dils indigens reagau e midau en dus giugadurs offensivs. Ils giugadurs da Schluein Glion han ussa puspei stuiu sedefender pli fetg, han denton tuttina buca saviu evitar l’egalisaziun dil resultat. Agim Zeciri ei vegnius lantschaus en la 71avla minuta da Medin Murati ed ha sittau il 2:2. Suenter quella egalisaziun han ils indigens vuliu dapli ed han fatg gronda pressiun. L’equipa da Schluein Glion ha denton rispundiu cun spertas cunterattaccas ed aschia adina puspei mussau ch’era ella vegli gudignar quei giug. E quei ei la finala era reussiu. Cura che l’ura da giug mussava gia dapi in temps che las novonta minutas seigien terminadas ei Lars Caduff aunc inagada vegnius lantschaus en ina buna posiziun avon il gol ed el ha fatg quei ch’el ha gia fatg en quest campiunadi nov gadas, numnadamein sittau la balla en la reit. Quei ei stau la victoria, ils emprems puncts egl jester ed il segl en la tabella sin plaz 4. Aschia sa ei ir vinavon.

FC Ruggell – US Schluein Glion 2:3 (1:1)

Widau. – 125 aspectaturs. – SR: Simeon.

Tore: 29. Caduff 0:1, 45. + 2. Murati 1:1, 62. Caduff 1:2, 71. Zeciri 2:2, 90. Caduff 2: 3.

Ruggell: Pirmin Marxer; Seemann (76. Ritter), Hirschbühl, Alexander Marxer (69. Pavicic), Maag; Kollmann, Bischof, Murati, Mamuti (63. Haas); Zeciri, Amzi (80. Pescio).

US Schluein Glion: Hornacek; Dermont, Matthias Derungs, Routek, Welter; Truffer (60. Luca Vinzens), Livio Derungs (84. Bundi), Gilian (80. Gomes Machado), Cavegn; Tiziano Vinzens (86. Airaghi).

Remarcas: Cartas mellnas: 28. Alexander Marxer (foul), 40. Murati (foul), 40. Hirschbühl (reclamar), 90. + 2. Caduff (giubilar) – 56. siet en petga Amzi. – Corners: 6:3.