Encunter ils davos dalla tabella, Lusitanos de Samedan, ei la secunda vegnida da mitschar cun in egl blau. Grazia al gol da nies capitani tegn l’equipa il contact tiels emprems plazs ella tabella.
Sil plaz pign ed artificial da Samedan ed encunter in adversari che muossa grondas emoziuns ei il giug partius schliet per l’USSI2. Ella 20avla minuta ha l’equipa da casa numnadamein saviu marcar igl 1:0 cun in siet deviau da rodund 20 meters. Ils hosps dalla Foppa han denton buc piars la gnarva, giugau vinavon lur giug ed ein aschia vegni d’egualisar 10 minutas pli tard. Suenter che Ivan Derungs haveva fiers en la balla, ha Gian Sgier dau in bi pass sin Ronny van Dead e lez ha stuschau la balla da gol en. Entochen pausa ha l’USSI2 smaccau vehementamein sil 2:1 ord lur vesta. Las acziuns decisivas avon il gol digl adversari han denton buc vuliu funcziunar sco giavischau.
La secunda mesadad ei stada empau ina copia dall’emprema. Ella 61avla minuta han ils attaccaders dils Lusitanos nezegiau la passivadad ella defensiun dall’USSI2 per sittar il 2:1. Puspei ha nossa secunda denton buc piars la gnarva. E puspei rodund 10 minutas pli tard ei Dennis Camenisch vegnius d’egualisar al 2:2 cun in bi siet da distanza. Pli lunsch ch’il giug serendeva alla fin e dapli ch’ils hosps han empruau lur cletg cun ballas liungas. Al success ha la fin finala in corner menau. Patrick Camenisch ei siglius in’alzada pli ad ault che ses adversaris ed ei vegnius da marcar il 3:2 ord vesta da sia equipa, bunamein ella davosa secunda. Quei gol ha muntau la decisiun, ils treis puncts ein vegni pachetai ella tastga e transportai a Schluein.
El proxim giug frunta l’USSI2 sill’equipa da Celerina, dumengia ils 06-10-2019 allas 14:00 a Celerina. Per la secunda ga en roda schai pia in giug ell’Engiadina aulta sil program.
Lusitanos de Samedan – US Schluein Ilanz 2 2:3 (1:1)
Promulins, Samedan
Gols: 20. Joao Rodrigues Pereira da Silva 1:0, 30. Ronny van Dead 1:1, 61. Pedro Junior da Silva 2:1, 70. Dennis Camenisch 2:2, 90.+3 Patrick Camenisch 2:3
US Schluein Ilanz 2: Marco Cavegn; Sven Brasser, Patrick Camenisch, Marc Camenisch, Ivan Derungs (70. Robin Studer); Livio Casutt (50. Arno Panier), Gian Sgier, Dennis Camenisch, Ronny van Dead; Fabian Coray (83. Silvan Frehner), Dario Derungs (90.+3 Fabian Coray)
Remarcas: admoniziuns USSI2: neginas, absenzas USSI2: Corsin Derungs (famiglia), Roni Caminada (pumpiers), Mauro Arpagaus (malsauns), Elia BĂĽchler (trenament), Flurin Capaul (vacanzas), Curdin Bundi (survetsch civil), Fabrizio Bonolini (famiglia), Dario Casutt (business), Remo Cavelti (blessaus), Mattia Paulin (trenament), Riet Riesen (seniors), Ronny Panier (seniors), Sandro Bleuler (privat), Cedric Wellinger (catscha), Ahmad Tavana (buc qualificaus), Hares Sadat (trenament), Miralem (famiglia)