Secunda victoria per Schluein Glion

Per la secunda gada banduna Schluein Glion il plaz sco victur en quest campiunadi da secunda ligia. Cun ina prestaziun pli u meins suverana batta l’equipa sursilvana il capogruppa d’enfin ussa St. Margrethen cun 2:0. Il resultat havess schizun saviu vegnir alzaus empau, bunas schanzas ein denton vegnidas munchentadas muort egoissem avon il gol.

St. Margrethen ha mussau naven dall’entschatta grond respect dall’equipa indigena e ha bien e gitg dau fetg defensiv ballapei. Il capogruppa d’enfin ussa ha surschau il giug cumpleinamein a Schluein Glion che ha saviu giugar ruasseivel anavon. In gol ha denton gitg buca vuliu curdar. Pér en la 38avla minuta eis ei stau aschi lunsch. Marino Cavegn, lantschaus cun in tric da Zenon Truffer, ei curius cun tempo en la da sedisch e ha stuschau la balla vi avon gol. Leu ha ei pariu sco sche Livio Derungs vegness buca da sittar la balla da gol en, el ei denton semenaus spert entuorn siu defensur e ha plazzau la balla fin el cantun bass.
Suenter pausa han ins viu gitg il medem maletg. St. Margrethen defensiv e Schluein Glion che empruava da crear occasiuns d’alzar il resultat. Duas, treis gadas fuss quei stau bein pusseivel. Mo, enstagl da stuschar la balla al camerat bein plazzaus e libers, eis ei vegniu empruau da sittar sez il gol ord posiziuns mein favoreivlas! Aschia eis ei gitg restau tier il 1:0 e St. Margrethen ha perquei pegliau in quart ura avon la fin empau curascha. Il trenader ha remplazau in defensur cun in attaccader e l’equipa ei vegnida pli offensiva, senza denton vegnir fetg malsegira. L’emprema gada sin gol ha l’equipa dalla vallada dil Rein sittau suenter 79. minutas, il siet ha denton buca inquietau fetg il goli da Schluein Glion. Suenter 87 minutas ei il gol decisiv lu finalmein curdaus. Patric Gilian ei vegnius lantschaus dalla vart dretga, ei curius sper siu defensur vi e ha lantschau Lars Caduff avon il gol che ha sittau la balla en la reit. Quei ei stau la decisiun ed ulteriurs treis puncts impurtonts per Schluein Glion. Il giug ha en tut cass mussau che l’equipa duess esser ferma avunda per saver surviver en la secunda ligia.

US Schluein Glion – FC St. Margrethen 2:0 (1:0)

Crap Gries. – 185 aspectaturs. – AR: Bracher

Gols: 38. Livio Derungs 1:0, 87. Caduff 2:0.

Schluein Glion: Hornacek; Dermont, Matthias Derungs, Routek, Welter; Truffer (72. Luca Vinzens), Cavegn (90.+ 4. Hossmann), Livio Derungs, Gilian (90. + 3. Gomes Machado); Tiziano Vinzens (80. Airaghi), Caduff.

St. Margrethen: Staudacher; Künzler, Jevic, Memeti (18. Rexhepi), Sinani (76. Fazliu); Dursun, D’Amico, Rushiti (64. Eris), Axhija; Gashi (46. Velija), Sylaj.

Remarcas: Cartas mellnas: 31. Caduff (foul) e Jevic (malsportivadad), 65. Veljia (foul) . – Corners: 4:2 – 79. siet en la petga Luca Vinzens.