Schluein Glion batta il favorit

Egl emprem giug a casa gudogna Schluein Glion ils emprems puncts e quei meritadamein. Il favorit, Rorschach-Goldach, ei ius suenter 12 minutas en avantatg, mo Schluein Glion ha saviu egalisar entras in penalti e suenter in‘ interrupziun dil giug pervia dalla plievgia cun cametgs sittar dus ulteriurs gols entochen pausa ed aschia sevolver sin la via al success.

Cun tensiun ha ina biala roscha d’aspectaturas ed aspectaturs spitgau sin igl emprem giug a casa en la secunda ligia. E tut tgi ch’ei vegnius a Crap Gries sonda sera ha astgau mirar in giug cun dabia tensiun e duas equipas che han dau naven dalla biala entschatta cun grond engaschament. Rorschach-Goldach, in’equipa cun giugadurs fetg ulivs, ei partida meglier el giug e ha retschiert en la dudischavla minuta in culp liber da bien 25 meters. Quel ha Patrice Baumann ferm sittau e bass sil terren bletsch, aschia che David Horncaek ha stuiu schar rebatter la balla. Oliver Baumann ha reagau sco emprem e sittau la balla rebattida da gol en. Schluein Glion ha mussau ina buna reacziun ed encuretg dapli l’offensiva. Suenter bien vegn minutas ei Luzi Dermont vegnius frenaus en la zona da puniziun cun in foul, aschia ch’igl arbiter ha schulau senza targlinar penalti. Lars Caduff ha surpiu la responsablad e marcau igl 1:1 cun in ferm siet el cantun bass dretg. Cuort pli tard ha igl arbiter interrut il giug per in bien quart ura. La plievgia ferma accumpignada da terments cametgs han procurau per quella pausa supplementara. Quella pausa ha fatg pli bein als indigens che als hosps. Aunc avon la pausa ufficiala eis ei numnadamein reussiu da marcar dus gols. Igl emprem ha Lars Caduff engulau la balla giu dil pei d’in defensur e marcau il 2:1 e mo in per minutas pli tard ha Luzi Dermont surviu cun in pass atras la da sedisch Patrik Gilian, il qual ha cuglienau in defensur e sittau cun in siet precis il 3:1 e siu emprem gol per Schluein Glion.
Suenter il té ha Rorschach-Goldach surpriu empau il domini dil giug ed il giugadurs da Schluein Glion ein seconcetrai da star bein en la defensiun e vegnir cun spertas cunterattaccas al success. En la 58avla minuta ha David Hornacek mussau ch’el ei in grond sustegn per Schluein Glion. Igl emprem ha el teniu cun in reflex in siet ord cuorta distanza ed era il secund siet ha el menau miraculusamein en corner cun sfundrar spért sco in gat giu el cantun bass. Aschia ei il proxim gol curdaus per Schluein Glion e buca per ils hosps. En la 72avla minuta ei Tiziano Vinzens vegnius lantschaus en l’ala seniastra, el ha fatg slalom cun ils defensurs ed aunc il goli e stuschau la balla a Lars Caduff che ha enten curdar a tiara sittau siu tierz gol persunal ed aschia decidiu il giug. Als hosps eis ei numnadamein mo pli reussiu da sittar in gol suenter in culp liber e scursanir il resultat. Per dapli ha ei buca tunschiu, cunquei ch’ils giugadurs indigens han cumbattiu entochen alla fin per mintga balla e meritau aschia ils treis puncts encunter in ferm adversari.

US Schluein Glion – FC Rorschach-Goldach 17 4:2 (1:1)
Crap Gries. – 285 aspectaturs. – AR: Zeciri

Gols: 12. Oliver Baumann 0:1, 21. Caduff 1:1 (p.), 34. Caduff 2:1, 38. Gilian 3:1, 72. Caduff 4:1, 78.
Lovric 4:2.

Schluein Glion: Hornacek; Cavegn, Routek, Livio Derungs, Welter; Dermont (90.+ 3. Maissen) Bundi
(73. Gomes Machado), Luca Vinzens (88. Truffer), Gilian (80. Airaghi); Tiziano Vinzens, Caduff.

Rorschach-Goldach: Babic; Di Bendedetto (64. Meister), Bosshart, Patrice Baumann, Canoski; Ben
Begalcem (58. Wagner Da Silva), Morina, Lovric, Schumacher (87. Yves Baumann); Acklin, Oliver
Baumann.

Remarcas: Cartas mellnas: 70. Wagner Da Silva (foul), 80. Gilian (foul), 90. + 2. Routek
(malsportadad). – Corners: 4:8. – 24. Interrupziun (malaura).