Finalmein ei il temps da spetga vargaus pils fanatichers dil ballapei regiunal – e gia ha l’USSI2 sil conto treis puncts.
Gia baul el giug havessen ils hosps dil Surmir giu la caschun d’ir en avantatg en quei giug. Igl attaccader dil CB Surses ha denton buc saviu profitar dil penalti ch’igl arbiter haveva dau suenter in giug cul maun. L’equipa da casa ha duvrau in mument entochen ch’ella ei propi vegnida el giug. Pass falli e malprecauziuns ein buca stai ina raritad ell’emprema mes’ura. Ella 42avla minuta eis ei reussiu a Dario Derungs da sittar igl 1:0 cul tgau suenter in tir liber da liunga distanza d’Arno Panier. Cun quei resultat eis ei iu ella pausa.
L’equipa da casa ei vegnida ord la garderoba cun gronda perschuasiun ed aschia eis gartegiu da marcar il secund gol suenter cuort temps da giug ella secunda mesadad. Ronny Della Morte ha saviu stuschar la balla da gol en suenter ina biala cumbinaziun. Sco in’equipa rutinada ha d’agir, ha l’USSI2 lu era agiu silsuenter. Igl ei gartegiau bein da tener ellas atgnas retschas la balla e consequentamein ein ils hosps buc vegni tier grondas caschuns da marcar. Pér ella 90avla minuta ha igl attaccader dil CB Surses saviu profitar d’ina malconcentraziun ella defensiun dall’USSI e scursanir sin 2:1. Paucs muments pli tard ha igl arbiter schulau giu il giug.
Viu sur tut ora astg’ins tschintschar d’ina entschatta gartegiada per nossa secunda. Ils treis puncts restan a Schluein e vegnan segir e franc a dar aunc dapli slontsch e motivaziun als giugadurs. El proxim giug ei l’USSI2 hosp a Razén, sonda ils 31-08-2019 allas 15:00.
US Schluein Ilanz 2 – CB Surses 2:1 (1:0)
Crap Gries, Schluein
Gols: 42. Dario Derungs 1:0, 47. Ronny Della Morte 2:0, 90. CB Surses
US Schluein Ilanz 2: Marco Cavegn; Cedric Wellinger, Patrick Camenisch, Marc Camenisch, Robin Studer (85. Roni Caminada); Arno Panier, Gian Sgier, Silvan Frehner (46. Mauro Arpagaus), Fabian Coray (59. Livio Casutt); Ronny Della Morte (90 Dario Derungs), Dario Derungs (82. Fabian Coray)
Remarcas: admoniziuns USSI 2: 30. Silvan Frehner (foul); 90. Fabian Coray (nunsportivadad)