Igl emprem giug da campiunadi en la secunda ligia ha entschiet en mal per Schluein Glion. Gia suenter treis minutas ha Romanshorn astgau ir en avantatg suenter in schenghetg dalla defensiun. Aschia eis ei lu era iu vinavon entochen la 36avla minuta: treis ulteriurs regals han lubiu als patruns casa d’augmentar il resultat sin 4:0 ed aschia decider il giug gia avon pausa.
Ei ha fatg la pareta sco sche Schluein Glion fuss aunc buca diltut alerts, cura ch’il giug ha entschiet a Romanshorn. Ils indigens han surpriu vehement il domini ed ein gest era i en avantatg. Suenter ina liunga remessa laterala culs mauns ei la balla rebattida dil goli e curdada a Christian Lang avon ils peis che ha buca giu breigia da marcar igl emprem gol. Era quella duscha freida ha buca svegliau ils giugadurs da Schluein Glion. Vinavon han ei surschau il giug als indigens e cunzun han ei era vinavon buca luvrau concentrau e decisiv en la defensiun. Quei han ils indigens nezegiau. En la schenivavla minuta ei Kai Länzlinger marschaus senza disturbi sper ils defensurs ora ed ha surviu la balla a Cedric Bieri per sittar il secund gol e mo treis minutas pli tard ha Kai Länzlinger sez astgau sittar cul tgau il 3:0 sin ina cunterattacca, suenter ch’in giugadur da Schluein Glion ha giu piars la balla liederli el moviment anavon. Ed gest il medem ei era schabegiau en la trentasisavla minuta. La balla ei vegnida piarsa cuort suenter la lingia da miez senza sforz ad in adversari, lez ha sittau in pass liung sin Kai Länzlinger ed il giuven attaccader ha marcau cun in siet precis naven dalla lingia da sedisch siu secund gol persunal. Cuort avon pausa ha lu il caposettagols da Schluein Glion, Lars Caduff, sittau siu emprem gol en secunda ligia. Ina biala flanca da dretg da Serafin Bundi ha el plazzau cul tgau en la reit.
Suenter il tè da pausa e duas midadas da giugadurs en l’equipa ha Schluein Glion giugau empau pli concentrau. Ils indigens han surschau il far il giug plitost als hosps ed ein seconcentrai sin tener il resultat e cunterattaccas. Schluein Glion ei aschia vegnius tier enqual caschun da marcar, denton liung temps senza reussir. Pér en l’otgontavla minuta ei il secund gol per ils hosps curdaus. Lars Caduff ha surpiu cuort avon la lingia da sedisch in pass da Luzi Dermont e ha buca studegiau gitg. Cun in plazzau siet cul pei seniester el cantun ault ha el battiu il goli indigen suveran. Quei gol ha cuortamein dau empau speronza da forsa tuttina aunc saver migliurar il resultat. Quella speronza ha denton buca cuzzau gitg. Mo duas minutas pli tard ei numnadmein il regal numra tschun da Schluein Glion suandaus. Enstagl da sittar la balla cun tutta vehemenza ord la zona da puniziun, eis ella vegnida sittada ad in giugadur da Romanshorn els peis e rebattida gest a Joel Kehl avon il peis che ha sittau ella en la reit al resultat final.
Fazit: Schluein Glion ha fatg duront igl entir giug memia bia sbagls persunals – cunzun en la defenisun – ed aschia lubiu agl adversari da marcar tgunschamein ses gols. Da quels sbagls astgan ins buca far en la secunda ligia, sch’ins vul recaltgar puncts. Perquei ha ei num: giugar sempel e concentrau e buca far regals agl adversari. Quei vala gia per il proxim giug che ha liug sonda proxima encunter Rorschach-Goldach.
FC Romanshorn – US Schluein Glion 5:2 (4:1)
Weitenzelg. – 95 aspectaturs. – AR: Oliva.
Gols: 3. Lang 1:0, 18. Bieri 2:0, 22. Länzlinger 3:0, 36. Länzlinger 4:0, 44. Caduff 4:1, 79. Caduff 4:2, 81. Kehl 5:2.
Romanshorn: Marolf; Stauffiger (63. Lucarelli), Damian Senn, Ajvazaj, Friedrich; Idrizi, Kehl (82. Züllig), Luca Senn, Lang; Bieri (73. Zanetti), Länzlinger (62. Sadiki).
Schluein Glion: Capaul; Gilian, Matthias Derungs (46. Routek), Livio Derungs, Silvan Welter; Bundi, Luca Vinzens (82. Maissen), Marino Cavegn, Tiziano Vinzens (62. Airaghi), Tuffer (46. Dermont), Caduff.
Remarcas: Cartas mellnas: 55. Luca Vinzens, 58. Lang, 60. Tiziano Vinzens, 70. Kehl, 74. Airaghi, 90.+2. Routek (tuts pervia da fouls). – 90.+4. siet en la petga Schluein (Airaghi). – Schluein Glion senza Hornacek (absents). – Corners: 3:4.