Victoria e promoziun per la secunda ligia

L’equipa da Schluein Glion gudogna siu davos giug da campiunadi clar e bein cun 3:0 encunter Valposchiavo e cuntonscha aschia igl emprem rang en la tabella e la promoziun per la secunda ligia. Bogn Ragaz ha numnadamein spiars el medem mument siu davos giug encunter Domat 2:4 ed aschia aunc stuiu surschar la plema a l’equipa dalla Surselva.

Exact suenter novonta minutas ha igl arbiter terminau il giug a Crap Gries ed aschia procurau per empau tensiun. Il giug sin la plazza Vial a Domat era numnadamein aunc buca a fin ed aschia ha l’equipa d’Alessandro Giacomelli, il giugadur-trenader che meina la squadra dapi la stad vargada, aunc stuiu spitgar in mument per saver arver las butteglias da schampagner. Cuort pli tard ein ils stappuns lu denton vegni siglientai ord la butteglias. Si da Domat ei la nova vegnida che Bogn Ragaz hagi spiars siu giug final e che Schluein Glion gudogni perquei il campiunadi dalla gruppa 1 dalla tiarza ligia. Quei munta la promoziun en secunda ligia, leu nua che Schluein Glion ha gia giugau naven da 2012 entochen 2016. Cordiala gratulaziun! La giuvna equipa ha meritau quella victoria cun bunas prestaziuns e fetg bien engaschament da tuts ils giugadurs. En 22 giugs ha la squadra spiars mo quater gadas e giugau ina gada pari. 17 giugs ein vegni gudignai, per la gronda part clar e bein. L’equipa ha sittau ils biars gols (63) da tuttas equipas e survegniu ils paucs (22), quei che muossa ch’ils giugadurs han en tut lur encurir l’offensiva mai emblidau che ina ferma defenisva gudogna in campiunadi. Cheu po era la scolaziun taliana dil trenader haver giu in certa influenza!

Mo ussa tiel giug encunter Valposchiavo Calcio. Schluein Glion ha dominau naven dall’enschatta e lubiu a Valposchiavo Calcio duront igl entir giug da sittar buca ina gada malsegir sin gol. En tutta ruasseivladad ha l’equipa da casa lantschau in’attacca suenter l’autra ed aschia reussiu duas gadas avon pausa ed ina gada suenter pausa. Igl 1:0 ha Lars Caduff sittau suenter 20 minutas cun in precis e sec siet da bein 25 meters el cantun bass dretg. Il 2:0 – cuort avon pausa – ei curdaus suenter ina biala cumbinaziun sur plirs giugadurs ed in pass final da Fabrizio Cavegn a Tiziano Vinzens che ha ord cuorta distanza buca munchentau il gol.

Suenter il té ha la biala roscha d’aspectaturas ed aspectaturs viu pli u meins il medem giug sco avon pausa; Schluein Glion en l’offensiva, Valposchiavo Calcio en la defensiun. En la 73avla minuta ha Silvan Welter surviu la balla bass e precis a Lars Caduff che ha marcau elegant cul calcogn siu 20avel gol en quest campiunadi ed aschia decidiu il giug definitivamein e medemamein gudignau la cruna dil caposettagols. Silsuenter han las duas equipas buca pli fatg mal ina a l’autra e giugau il giug en tutta ruasseivladad alla fin. Ed alla fin han – sco gia menziunau – tuts spitgau sil resultat final si da Domat….

US Schluein Glion – Valposchiavo Calcio 3:0 (2:0)

Crap Gries, Schluein. – 345 aspectaturs. – AR: Muniain

Gols: 20. Caduff 1:0, 43. Tiziano Vinzens 2:0; 73. Caduff 3:0.

Schluein Glion: Hornacek; Marino Cavegn, Matthias Derungs, Livio Derungs, Dermont (83. Sergio Welter); Bundi (78. Gomes Machado), Luca Vinzens, Silvan Welter (84. Airaghi), Tiziano Vinzens (75. BĂĽchler); Fabrizio Cavegn (87. Gartmann), Caduff (78. Truffer).

Valposchiavo: Foppoli (80. Tuena); Solèr (36. Fabio Crameri), Kalt, Fiorina, Cristiano; Sala, Menghini, Pellicoli (78. Mauro Crameri), Lardi (68. Cortesi); Raselli, Nakarin Phatphuang.

Remarcas: Carta mellna: 25. Kalt (reclamar). – Schluein Glion senza Andreoli (blessaus) – 21. gol da Caduff vegn annulaus (ordgiug). – debut da Zenon Truffer. – Corners: 8:1.