Davos giug da campiunadi per nossas dunnas

Suenter nossa plitost „nera“ dumengia encunter igl FC Untervaz, havein nus aunc inaga dumignau ensemen nossa cumpletta motivaziun per serender a nies davos giug da campiunadi.

Da temperaturas cauldas (a Glion!) essan nus semetti sin viadi a Celerina. Il liung viadi ha fatg vegnir enqual giugadura stauncla ni schizun alva :-). Denton tut quei ei buc stau motiv per nus da patertgar negativ. Cun massa motivaziun e speronza havein nus entschiet nies davos giug punct allas quater. Las empremas minutas laian sentir la gnervusadad da tuttas giugaduras. E gia suenter la 20 avla minuta decida il trenader Gian sco era il trenader da Celerina da far las empremas midadas. Uss entscheiva il giug a survegnir tempo. Las damas digl USSI han anflau lur strategia e dattan in bi ball ensemen. Quella lavur selai pagar ora ella 43avla minuta. Cun in bellezia pass davenda miez da Selina Schmed sa l’Ornella cuorer dall’alla si. Las giugaduras da Celerina semettan sin lur posiziun, mo tut quei memia tard. Ornella ei persula avon gol e nazegia la schanza. Cun in ault siet gartegia ella denter latta e goli e marchescha aschia igl 1:0. Cun nova forza e motivaziun va ei vinavon. Era ellas proximas minutas ein las damas digl USSI vid il ball e dattan neginas schanzas a Celerina.

Suenter pausa va ei tuttina vinavon. Celerina vegn tier paucas schanzas e piardan dabia il ball. Nossas damas munchenteschan impèr bialas schanzas. Aschia suondan las proximas midadas tier Celerina. Cuort suenter paran tuttas damas dall’USSI gnervusas. Enqual fans da Celerina bettan aunc impau „benzin el fiug“ ed aschia daventa quei giug fetg malruasseivels. E quella schanza nazegia Celerina e marchescha igl 1:1 ella 87avla minuta. Cuort suenter schula igl arbiter giu il giug.

Era cun igl 1:1 essan nus cuntentas, pertgei ch’ina biala e ferma sesiun va a fin per nus. Las damas digl USSI engrazian cordialmein a tut ils aspectaturs pil sustegn e selegran da veser vus puspei tier ils proxims giugs.

per l’USSI: Darms Tatjana (C), Tomaschett Selina, Hubert Sarah, Hubert Laura, Spescha Lorena, Schmed Selina, Demont Sina, Hubert Nadine, Peng Lara, Tomaschett Svenja, Ozbak Zahra

Reserva: Columberg Ornella, Deplazes Sarah

Rapport: Ornella Columberg