Victoria era encunter Tusaun-Cazas

Quei ch’ei els davos onns buca capitau savens ei vegniu realitad sonda vargada: finalmein ha Schluein Glion era saviu gudignar puspei inagada a Cazas sin la plazza sportiva s. Martin in giug encunter l’equipa da Tusaun-Cazas.

Encunter in’equipa da casa sco adina fetg cumbattiva ed agressiva ha Schluein Glion entschiet il giug cun schar circular bein la balla e baghegiar si lur attaccas sur las alas. Quei ei gartegiau magari pulit ha denton purtau negin fretg en fuorma da gols. Ils emprems gols ein persuenter curdai suenter siets da cantun ed in culp liber. Schluein Glion ei ius en avantatg cun igl emprem gol da Matthias Derungs en las colurs dall’equipa dalla Foppa. Suenter in siet da cantun eis el seglius il pli ad ault ed ha diregiu la balla cul tgau ferm e plazzau en la reit. Cuort pli tard ha l’equipa da casa astgau sittar siu emprem siet da cantun. Quei siet ha Dario Rüedi menau cul tgau da cuorta distanza ord in smugl da giugadurs en la reit, medemamein cul tgau. Ed era il tierz gol ei curdaus cun in bi siet cul tgau. Quella gada ei Fabrizio Cavegn vegnius survius da Luca Vinzens perfetg cun ina flanca suenter in culp liber e ha naven dalla lingia da tschun schau neginas schanzas al goli indigen. Cuort avon la pausa ha Luca Vinzens lu aunc schau rebatter la traversa cun in bellezia e ferm siet da distanza ed aschia mussau ch’igl avantatg per Schluein Glion era meritaus.

Sin via en la cabina ha il giugadur indigen Marco Sax, ch’era mo cuort avon vegnius admonius digl arbiter per reclamar, buca saviu far auter che reclamar danovamein, aschia che tal ha buca targlinau e mussau ad el la secunda carta mellna. Ils indigens han pia stuiu giugar l’entira secunda mesadad mo cun diesch umens. Quels diesch umens han fatg tut il pusseivel per egalisar, han denton buca giu flad e forza avunda per tener pètg ni schizun dominar l’equipa da Schluein Glion duront l’entira secunda mesadad. Aschia han ils Sursilvans decidiu il giug definitiv cun dus ulteriurs gols el davos quart ura da giug. Gl’emprem ha Marino Cavegn engulau la balla al davos defensur e marcau igl 1:3 e cuort avon la fin ha ina biala cumbinaziun sur Rui Machado e Marino Cavegn menau al quart gol das Schluein Glion, sittaus da Lars Caduff.

CB Tusaun/Cazas – US Schluein Glion 1:4 (1:2)

S. Martin, Cazas. – 140 aspectaturs. – AR: Zeciri

Gols: 19. Matthias Derungs 0:1, 24. RĂĽedi 1:1, 34. Fabrizio Cavegn 1:2, 74. Marino Cavegn 1:3, 89. Caduff 1:4.

Tusaun/Cazas: Noll; Spörri, Roman Canonica (80. Fabio Caonica), Senn, Tillessen (79. Michael); Rüedi, Komposch (80. Bühler), Neuhaus, Spiller; Sax, Grischott (58. Brenn).

Schluein Glion: Hornacek; Dermont (90. Büchler), Matthias Derungs, Livio Derungs, Silvan Welter (88. Sergio Welter); Bundi (40. Gartmann), Luca Vinzens (90.+2. Möglich), Marino Cavegn, Tiziano Vinzens (80. Airaghi); Fabrizio Cavegn (80. Gomes Machado), Caduff.

Remarcas: Cartas mellnas: 41. Sax (reclamar), 54. Livio Derungs (foul). – Carta mellen/tgietschen: 45.+3. Sax (reclamar). – 44. siet en la traversa da Luca Vinzens. – 40. Bundi croda ora blessaus. – Corners: 3:7.