En in giug cun perfectas cundiziuns da rama ed in diember d’aspectaturas ed aspectaturs admirabel ei l’USSI2 buc vegnida da cuntinuar la seria da victorias. Avon il gol digl adversari han la davosa perschuasiun ed empau saung freid muncau.
Gia naven dall’entschatta dil giug ha nossa secunda sespruau da mussar tgi ch’ei il caucasa a Crap Gries. Entginas combinaziuns cultivadas ed acziuns gartegiadas encunter anavon han animau pliras gadas ils aspectaturs d’applaudir. La pli biala staffetta culla balla ei stada da contemplar ella 29avla minuta. La balla ei circulada bein atras las retschas dall’equipa en mellen, naven dall’atgna mesadad entochen ella da sedisch digl adversari. Leu ha Ronny Della Morte atgnamein fatg tut endretg, siu siet cun bia peiver ha denton mo schau stremblir la traversa dil gol da Panaduz. La balla rebattida ha silsuenter era Dario Casutt buc saviu deponter ellas maschas. Gnanc diesch minutas pli tard ha in attaccader da Panaduz schoccau l’equipa da casa. Ella 36avla minuta ha siu siet da distanza numadamein anflau la via en gol. L’egualisaziun dil resultat ha buc vuliu gartegiar all’USSI2 entochen pausa, malgrad pliras bunas schanzas da marcar.
Ella secunda mesadad ha l’USSI2 schau suenter empau. Da bia ei la balla vegnida spedida ault entcunter anavon, bialas combinaziuns ein vegnidas pli raras. Tuttina ha ei dau pliras occasiuns da marcar igl 1:1, savens suenter situaziuns da standard. La precisiun, magari era la perschuasiun ed oravontut il saung freid han denton muncau. Consequentamein ei la nulla restada silla tabla da giug per l’equipa da casa. Cuort avon la fin ei l’equipa da Panaduz vegnida da marcar al resultat final da 0:2 cun ina cunterattacca.
El proxim giug frunta l’USSI2 sill’equipa da Cuera3, dumengia ils 02-06-2019 allas 16:00 a Cuera, Obere Au.
US Schluein Ilanz 2 – FC Bonaduz 0:2 (0:1)
Crap Gries, Schluein
Gols: 36. FC Bonaduz 0:1, 90. FC Bonaduz 0:2
US Schluein Ilanz 2: Flurin Capaul; Dario Casutt (78. Robin Studer), Patrick Camenisch, Marc Camenisch, Ronny Panier (46. Cedric Wellinger); Arno Panier (69. Livio Casutt), Gian Sgier, Dennis Camenisch, Fabian Coray (78. Ronny Della Morte); Ronny Della Morte (46. Noah Weber), Dario Derungs
Remarcas: 29. siet alla traversa da Ronny Della Morte, admoniziuns USSI2: 65. Fabian Coray (foul)
Rapport: Marco Cavegn