En in giug encunter in’equipa ferma ha Schluein Glion saviu decider il giug cuort avon la fin muort il secund gol persunal da Fabrizio Cavegn. Diltut meritada ei quella victoria denton buca, Cuera 97 2 ha pil pli dominau il giug e havess el minimum meritau in remis.
Il giug ha entschiet en fetg bein per l’equipa da casa. Era sche ils hosps han giu all’entschatta la balla pli savens en lur retschas, steva ei suenter in quart ura 2:0 per Schluein Glion. En l’otgavla minuta ei Lars Caduff vegnius survius perfetg en la zona da puniziun da Cuera 97 2 e ha marcau en tutta ruasseivladad igl emprem gol. Siat minutas pli tard han Lars Caduff e Fabrizio Cavegn recaltgau la balla en la zona offensiva e han manuvrau ora la defensiun cun ina staffetta da pass, entochen ch’il davos numnau ei staus persuls avon gol e ha buca giu breigia da stuschar la balla en gol. Vi dil giug han quels dus gols buca midau bia: Cuera 97 2 ha empruau da baghegiar si il giug ed aschia vegnir al success; Schluein Glion ha empruau siu cletg cun spertas attaccas ord la defensiun. Ad omisduas equipas eis ei entochen en la 38avla minuta denton buca reussiu da crear acziuns decisivas. En quella minuta ha lu Lorenzo Cazzato cuglienau siu adversari ed ei entraus cun spertadad en la zona da puniziun, nua ch’el ei vegnius frenaus cun il foul. Il penalti ha Mitko Gjorgjievski nezegiau per reducir il disavantatg cun in ferm e plazzau siet el cantun bass.
Cuort suenter pausa ha l’equipa da casa alzau il resultat suenter in siet da cantun. La balla ei setschentada avon ils peis a Marino Cavegn che ha spediu ella cun saung freid en la reit. Ils hosps han malgrad quella duscha freida buca dau si ed empruau cun grond engaschament da dar ina midada al giug. En la 54avla minuta ei perquei reussiu a Lorenzo Cazzato ord cuorta distanza il 3:2, aschia ch’els han pèr da dretg ferdau la puorla. Els han vinavon fatg pressiun e procurau per disuorden en la defensiun dils indigens. Quei ha purtau fretgs. Tredisch minutas avon la fin ha in defensur da Schluein Glion tuccau la balla cun siu bratsch en la zona da puniziun, aschia ch’igl arbiter ha schulau per la secunda gada in penalti per Cuera 97 2, il qual Mitko Gjorgjievski ha puspei realisau suveran.
Omisduas equipas han silsuenter encuretg la decisiun. Gartegiau ei quella a Schluein Glion. Cuort avon la fin dil giug ha Fabrizio Cavegn lantschau Tiziano Vinzens sin la vart seniastra. Lez ha priu catsch per in da ses solos e cuglienau plirs defensurs per lu pupei tuschar la balla a Fabrizio Cavegn che ha cun siu secund gol persunal decidiu il giug en favur dall’equipa da casa.
US Schluein Glion – Cuera 97 2 4:3 (2:1)
Crap Gries, Schluein. – 173 aspectaturs. – AR: Zimmermann
Gols: 9. Caduff 1:0, 15. Fabrizio Cavegn 2:0, 38. Gjorgjievski 2:1 (p); 47. Marino Cavegn 3:1; 54. Cazzato 3:2, 77. Gjorgjievski 3:3 (p), 86. Fabrizio Cavegn 4:3.
Schluein Glion: Hornacek; Marino Cavegn, Möglich, Livio Derungs, Silvan Welter; Coray (62. Dermont), Luca Vinzens, Andreoli (77. Airaghi), Tiziano Vinzens (90. Sergio Welter); Fabrizio Cavegn (90.+3. Büchler), Caduff.
Cuera 97 2: Senteler; Rodrigues (21. Cazzato), Catricala, Durmisi, Violi (83. Rodrigues); Sewer (66. Da Silva), Hunger, Yogarajah (75. Ott), Heeb; Zimmermann, Gjorgjievski.
Remarcas: Schluein Glion senza Bundi (serraus), Truffer (blessaus), Matthias Derungs (absents). – Cartas mellnas: 56. Tiziano Vinzens (foul), 65. Sewer (foul), 74. Livio Derungs (foul), 87. Luca Vinzens (foul), 90.+ 4. Rodrigues (foul). – Corners 4:7.
Rapport: Beat Dermont