Priu cun ils puncts da Mutteins a Schluein

Grazia a dus gols da Dario Derungs ed il ferm cumbat dall’entira equipa ha l’USSI2 saviu festivar la tiarza victoria en seria.

Il giug ha entschiet schliet per l’USSI2. Gia suenter duas minutas ei l’equipa da casa ida en avantatg grazia a plirs sbagls individuals dils giugadurs en mellen. Suenter quella duscha freida ei nossa secunda vegnida meglier e meglier el giug. Ils giugadurs dall’USSI2 han entschiet a gudignar dapli cumbats e schar ir meglier la balla ellas atgnas retschas. Consequentamein ha Dario Derungs egualisau il resultat cun siu siet ord cuorta distanza ella 25avla minuta. El era vegnius survius perfetgamein da ses congiugadurs. Cun in resultat dad 1:1 eis ei iu ella pausa.

Ella secunda mesadad han las equipas neutralisau pli u meins ina l’autra. Propi grondas caschuns da marcar ha ei buc dau entochen in quart d’ura avon la fin. Ella 78avla minuta ei il caposettagols dall’USSI2 vegnius da marcar siu secund gol cun in siet plazzau. Quei ei medemamein stau il “game winning goal” per sia equipa. L’US Danis – Tavanasa ei numnadamein buc pli vegnida da surmuntar la defensiun dall’USSI2 ellas davosas minutas. Cun la victoria en quei giug da sis puncts vegn nossa secunda probablamein buc pli vargada ella tabella dall’USDT e sa quintar da finir la sesiun 2018/19 sin in dils emprems treis plazs.

El proxim giug frunta l’USSI2 sill’equipa da Panaduz, dumengia ils 26-05-2019 allas 16:00 a Schluein.

US Danis – Tavanasa – US Schluein Ilanz 2 1:2 (1:1)
Mutteins, Tavanasa

Gols: 2. US Danis – Tavanasa 1:0, 25. Dario Derungs 1:1, 78. Dario Derungs 1:2

US Schluein Ilanz 2: Marco Cavegn; Dario Casutt, Patrick Camenisch, Marc Camenisch, Sven Brasser; Fabian Coray (65. Ronny Della Morte), Gian Sgier, Dennis Camenisch, Arno Panier (68. Livio Casutt); Noah Weber (85. Ivan Derungs), Dario Derungs

Remarcas: neginas admoniziuns

Rapport: Marco Cavegn