El giug da recuperaziun encunter il CB Laax ha l’USSI2 recaltgau ils proxims treis puncts – denton senza brigliar.
Il giug ha entschiet bein per l’USSI2. Gia ella secunda minuta ei Dario Derungs vegnius da stuschar la balla da gol en agl 1:0 ord vesta da sia equipa. Mo cuort suenter havessen ulteriurs gols stuiu curdar per l’equipa en mellen. Inaga dapli ei l’efficienza munglusa avon il gol digl adversari denton setratga atras il giug da nossa secunda sco in fil tgietschen. Damai che l’equipa da casa ei buc stada habla da crear propi bunas acziuns encunter anavon, eis ei restau tiel 0:1 entochen la fin dall’emprema mesadad.
Ella secunda mesadad ei la partida vegnida empau pli uliva, damai che l’USSI2 ha schau suenter aunc empau pli fetg. Per ella 78avla minuta ei il secund gol curdaus. Dario Derungs ei vegnius da finir ina bial’acziun cun sittar la balla d’ina distanza da sur 16 meters ellas maschas. Tgi che ha tertgau che la grascha seigi menada definitivamein cun quei gol, ei sesbagliaus. Ella 88avla minuta ei l’equipa da casa numnadamein vegnida da marcar lur emprem gol suenter in culp liber. Propi grondas schanzas ha ei denton tuttina buc pli dau pil CB Laax d’egualisar. Aschia ei il giug ius a fin cun in resultat dad 1:2. L’USSI2 pren pia a casa per l’emprema gada quella primavera puncts d’ordeifer Crap Gries.
El proxim giug frunta la secunda dall’USSI sill’US Danis-Tavanasa, sonda ils 18-05-2019 allas 19:15 a Tavanasa.
CB Laax – US Schluein Ilanz 2 1:2 (0:1)
Lag sec, Laax
Gols: 2. Dario Derungs 0:1, 78. Dario Derungs 0:2, 88. CB Laax 1:2
US Schluein Ilanz 2: Flurin Capaul; Ivan Derungs, Patrick Camenisch, Cedric Wellinger, Luzi Dermont; Noah Weber (81. Roni Caminada), Dennis Camenisch, Arno Panier (55. Livio Casutt), Fabian Coray; Ronny Della Morte (64. Sandro Bleuler), Dario Derungs (75. Curdin Bundi)
Remarcas: admoniziuns USSI2: 32. Arno Panier, 63. Ronny Della Morte