Gia suenter 23 minutas menava l’equipa da Schluein Glion entras treis bials gols cun 3:0 e cun dominar il giug suenter giavisch. Silsuenter han ils giugadurs dalla Surselva denton munchentau da decider il giug definitivamein, aschia ch’els han suenter dus gols da Eschen Mauren aunc stuiu temer empau per ils puncts.
Baul igl avonmiezgi ha Schluein Glion entschiet il giug concentrau e cun in bien moviment offensiv sil plaz artificial ad Eschen. Ed ils paucs fans dall’equipa sursilvana che han da tut aura anflau la via en il Principadi dil Liechtenstein han buca stuiu spitgar gitg sin l’emprema attacca gartegiada da lur equipa. Gia suenter quater minutas ei Marino Cavegn mitschaus dall’ala dretga si ed ha sittau la balla bass e ferm sin gol. Il goli ha stuiu schar rebatter la balla avon ils peis da Patric Andreoli che ha saviu stuschar ella da gol en. En quei stil eis ei iu vinavon. Diesch minutas pli tard ha Tiziano Vinzens mussau ils calcogns alla defensiun indigena e nudau cun in siet plazzau el cantun liung il 0:2 e cuort pli tard, en la 23avla minuta, ei puspei Marino Cavegn staus memia sperts per ils defensurs e ha surviu la balla cun in pass travers a Lars Caduff che ha marcau ord cuorta distanza il tierz gol. Silsuenter ha Schluein Glion reduciu empau il tempo ed aschia dau als giugadurs indigens la pusseivladad d’egualisar empau il giug, senza denton saver crear occasiuns da marcar. Perquei ei igl emprem gol per Eschen Mauren lu era curdaus empau surprendent. Philipp Ospelt ha profitau d’ina malcapientscha avon la zona da puniziun da Schluein Glion, ha recaltgau la balla, cuglienau il davos defensur e battiu David Hornacek cun in ferm e plazzau siet el tschiel dalla reit.
Suenter pausa ha Schluein Glion surschau pli e pli il far il giug als indigens. Vegnir al success cun spertas cunterattaccas ei stau la devisa dall’equipa d’Alessandro Giacomelli. Quei ei denton buca gartegiau propi bein, cunquei che la precisadad ha muncau memia savens. Il quart gol havess denton tuttina saviu curdar differntas gadas. Aschia per exempel en la 55avla minuta, cura che Lars Caduff ha tuccau cun in siet cul tgau mo la traversa ni en la 74avla minuta, cura ch’il medem giugadur ei mitschaus a tuts e curius persuls encunter gol. Il davos mument ei la balla denton ruclada naven dil pei al caposettagols, aschia ch’il goli digl adversari ha saviu fermar la balla e lantschar in’attacca che ha purtau success ad Eschen Mauren. Philipp Ospelt ha per la secunda gada tuccau la mira cun in ferm e plazzau siet naven dalla lingia da sedisch anora. Quei gol ha procurau per empau tensiun per las davosas minutas dil giug. Eschen Mauren ha fatg pressiun ed empruau d’egalisar; e quei fuss en l‘85avla minuta bunamein gartegiau. Cedric Chevalley ha denton ord cuorta distanza buca tuc la balla endretg, aschia che David Hornacek ha saviu fermar ella senza grondas breigias. Cuort avon la fin ei ina cunterattacca da Schluein Glion lu tuttina aunc gartegiada. Fabrizio Cavegn ei vegnius lantschaus sin la vart seniastra, ha encuretg cun tempo la via directa encunter gol e stuschau la balla travers a Lars Caduff che ha sittau siu quindischavel gol en quest campiunadi e decidiu il giug definitivamein.
USV Eschen/Mauren – US Schluein Glion 2:4 (1:3)
Sportpark Eschen. – 35 aspectaturs. – AR: Lekaj
Gols: 5. Andreoli 0:1, 15. Tiziano Vinzens 0:2, 23. Caduff 0:3, 40. Ospelt 1:3, 70. Ospelt 2:3, 87. Caduff 2:4.
Eschen/Mauren: Lüchinger; Weibel (64. Fetahi), Odobasic, Bissig, Nipp; Haas, Ospelt, Wolfinger, Bleisch; Chevalley, Pattocchio (80. Wohlwend).
Schluein Glion: Hornacek; Silvan Welter, Matthias Derungs, Livio Derungs, Marino Cavegn; Bundi (75. Gartmann), Luca Vinzens, Fabrizio Cavegn (89. Wellinger), Tiziano Vinzens (84. Büchler); Andreoli (67. Sergio Welter), Caduff.
Remarcas: Schluein Glion senza Dermont e Truffer (reconvalescents). – Cartas mellnas: 52. Bundi (foul), 65. Ospelt (foul), 70. Pattochio (reclamar), 71. Fabrizio Cavegn (foul), 74. Livio Derungs (foul), 90.+2. Odobasic (reclamar). – 55. siet cul tgau en la traversa da Lars Caduff. – Corners: 7:3.