Ordvart flop – a casa top – tenor quei motto ha l’USSI2 giugau ils emprems quater giugs dalla runda da primavera 2019. Cun ina buna prestaziun eis ei gartegiau da recaltgar treis puncts el giug da casa encunter Domat 2.
Sut cundiziuns perfetgas ha il giug entschiet la sonda allas 18:00 a Schluein. Aschia han ils paucs aspectaturs che han anflau la via a Crap Gries era viu ina partida animanda naven dall’emprema minuta. Ella 11avla minuta ha il defensur da Domat mo saviu frenar Noah Weber cun in foul – penalti. Marc Camenisch ha giu negina breigia da plazzar la balla en la reit agl 1:0. Ferton che l’equipa da Domat ei adina puspei vegnida malsegira entras situaziuns da standard avon il gol dall’equipa da casa, ha l’USSI2 adina puspei mussau sias qualitads cun combinaziuns cultivadas entochen ella da sedisch digl adversari. Ella 30avla minuta ha Dennis Camenisch saviu nezegiar ina tala bial’acziun cun marcar al 2:0, suenter che pliras bunas caschuns eran vegnidas munchentadas avon. Cun quei resultat eis iu ella pausa.
Sco l’emprema mesadad haveva calau eis iu vinavon ella secunda mesadad. Aschia ei Dario Derungs vegnius da sittar il 3:0 ella 60avla minuta. Suenter ch’il goli da Domat haveva parau las empremas duas emprovas da Dario Derungs e Noah Weber, ha la tiarz’emprova purtau fretg – haregiar ei quei che munta. Ella 82avla minuta eis ei tuttina aunc gartegiau a Domat da marcar il gol da honur, per dapli ha ei denton buc tunschiu ad els. Memia concentrau han ils giugadurs dall’USSI2 agiu ed aschia schau tier mo pauc ell’atgna da sedisch. Ils treis puncts restan pia a Schluein.
Ella jamna che vegn spetgan dus derbys silla secunda – mesjamna allas 20:00 a Laax e sonda allas 19:15 a Tavanasa.
US Schluein Ilanz 2 – FC Ems 2 3:1 (2:0)
Crap Gries, Schluein
Gols: 11. Marc Camenisch (penalti) 1:0, 30. Dennis Camenisch 2:0, 60. Dario Derungs 3:0, 82. FC Ems 2 3:1
US Schluein Ilanz 2: Marco Cavegn; Dario Casutt (75. Ronny Panier), Patrick Camenisch, Marc Camenisch, Sven Brasser (66. Ivan Derungs); Arno Panier (71. Livio Casutt), Gian Sgier (75. Silvan Frehner), Dennis Camenisch, Noah Weber; Ronny Della Morte (66. Fabian Coray), Dario Derungs (82. Roni Caminada)
Remarcas: admoniziuns USSI 2: 57. Gian Sgier (foul)