Cun buca meins che tschun giuvens en la vegliadetgna da juniors ha Schluein Glion entschiet en il giug encunter Netstal e dominau pli u meins tenor giavisch. Sulettamein il sittar gols ha buca propi vuliu funcziunar entochen pausa. Alla fin ei tuttina reussiu ina victoria clara ed era en quella altezia meritada.
Suenter las duas terradas encunter Domat e Sargans ha l’equipa da Schluein Glion vuliu gudignar per tut prezzi il giug encunter ils hosps dalla Glaruna. Naven dall’entschatta ha l’equipa da casa priu perquei il giug enta maun ed iniziau in’attacca suenter l’autra en direcziun dil gol da Netstal. Quei denton senza grond success, igl emprem gol ha malgrad bunas caschuns da marcar buca vuliu curdar. Aschia ch’ei fuss en la 36avla minuta bunamein gartegiau als hosps dad ir en avantatg. En ina dallas fetg paucas gadas che Netstal ei cumparius en la da sedisch da Schluein Glion ha Bilal Toprakkale tuc cun in ferm siet mo la petga. La risposta sin quella acziun ein stau in bi siet dil giuven Aron Büchler ch’ei rebattius dalla traversa giu sin la lingia da gol e suenter 41 minutas finalmein igl emprem gol per ils patruns casa. Suenter ina cumbinaziun sur pliras staziuns ha Serafin Bundi surviu la balla a Patric Andreoli che ha realisau ord cuorta distanza.
La secunda mesadad ha buca purtau bia da niev a quei giug ch’ei vegnius giugaus d’in aura plitost malempreneivla avon ina fetg mudesta retscha d’aspectaturas ed aspectaturs. Schluein Glion ha attaccau, Netstal ha empruau da sedefender aschi bein sco pusseivel. Quei ei buca gartegiau gest tuttina bein sco avon pausa, cunquei ch’in per giugadurs dils hosps han piars empau lur forzas. Ils giugadurs da Schluein Glion persuenter han nezegiau empau meglier lur pusseivladads ed aschia alzau il resultad successivamein. Igl emprem ha Luca Vinzens stuschau la balla da gol en suenter in siet da Mattia Coray ch’ei rebattius dalla petga e cuort pli tard ha Marino Cavegn decidiu il giug defintiv cun in siet naven dalla lingia da sedisch el cantun bass. Il quart gol ei curdaus suenter ina sperta attacca sur la vart dretga. Lars Caduff ei mitschaus da siu adversari ed ha lantschau cun in bi pass travers Fabrizio Cavegn che ha buca giu grondas breigias da sittar la balla al resultad final da 4:0 en la reit.
US Schluein Glion – FC Netstal 4:0 (1:0)
Crap Gries. – 116 aspectaturs. – AR: Luman
Gols: 41. Andreoli 1:0, 61. Luca Vinzens 2:0, 64. Marino Cavegn 3:0, 73. Fabrizio Cavegn 4:0.
Schluein Glion: Hornacek; Marino Cavegn, Matthias Derungs, Livio Derungs, Büchler (77. Gartmann); Bundi (80. Möglich), Luca Vinzens, Machado Gomes (83. Airaghi), Coray (63. Fabrizio Cavegn); Andreoli (65. Tiziano Vinzens), Caduff.
Netstal: Grob; Catanzaro, Angelo Contardi, Pfeiffer, Barbieri (75. Prizio); Lopes Teixeira, Andrea Contardi (81. Murati), Kormann, Sevic; Jashari, Toprakkale.
Remarcas: Schluein Glion senza Dermont e Truffer (blessai); Wellinger, Sergio e Silvan Welter (absents). – Cartas mellnas: 71. Matthias Derungs (foul), 75 Barbieri (foul). – 36. siet en la petga Netstal (Toprakkale), 39. siet en la traversa Schluein Glion (Büchler). – Corners: 5:2.