En in giug plitost mediocher spiarda l’USSI2 il secund giug en seria. Puspei ei l’efficienza munglusa avon il goal digl adversari stada il motiv principal per il resultat negativ ord vesta dils hosps dalla Foppa.
Ell’emprema mesadad ha l’USSI2 giu dapli dil giug ch’il CB Surses. Per part parev’ei mo dad esser ina damonda da temps cu che l’equipa en mellen mondi en avantatg. Denton tuttas schanzas da marcar ein vegnidas munchentadas. U ch’ils siets han tuc las ballas da silo davos il goal dil CB Surses, ch’il goli da Surses ei vegnius d’evitar il goal ni ch’in defensur dall’equipa da casa ei vegnius da spindrar sin lingia.
Ella secunda mesadad ei il giug semidaus marcantamein. Il CB Surses ei vegnius meglier el giug ed ha consequentamein marcau igl 1:0 ella 50avla minuta. Probablamein ha igl arbiter cun in’experientscha da sur 1’500 giugs survesiu igl “obseits” digl attaccader da Surses. Mo 10 minutas pli tard, suenter che l’USSI2 ha schau ora ulteriuras schanzas, ei l’equipa da casa perfin vegnida d’alzar il resultat sin 2:0 cun in siet da distanza. Ella davosa mes’ura dil giug eis ei buc gartegiau a nossa secunda da midar enzatgei vid il resultat. Igl adversari ha agiu bia pli aggressiv e cun dapli perschuasiun ed ha aschia buc schau tier in goal. Propi 90 minutas da piarder la gnarva sco aspectatur, buc mo pervia dil giug fleivel dall’USSI2, mobein era pervia dil suffel criu che ha tratg sper il plaz ed igl implont da protecziun civila da Tinizong ora.
Plaunsiu vegn ei puspei uras per nossa secunda da recaltgar puncts, per saver tener il tierz plaz ella tabella. La proxima occasiun sedat sonda, ils 11-05-2018 allas 18:00 a Schluein encunter la secunda da Domat.
CB Surses – US Schluein Ilanz 2 2:0 (0:0)
Tinizong
Gols: 50. CB Surses 1:0, 60. CB Surses 2:0
US Schluein Ilanz 2: Flurin Capaul; Dario Casutt (65. Ronny Della Morte), Patrick Camenisch, Marc Camenisch, Cedric Wellinger; Ronny Della Morte (46. Fabian Coray), Dennis Camenisch, Arno Panier (77. Silvan Frehner), Sven Brasser (65. Curdin Bundi); Mauro Arpagaus (70. Dario Casutt), Dario Derungs
Remarcas: neginas admoniziuns