Schluein Glion fa ulteriurs schenghetgs

Era margis sera, el giug da recuperaziun encunter Sargans, ei l’equipa da Schluein Glion semussada sco in bien hosp e ha fatg ulteriurs schenghetgs. Aschia ha l’equipa piars siu secund giug en seria ed era piars per il mument il cuntact cun il capogruppa Bogn Ragaz.

Encunter l’equipa da Sargans ha Schluein Glion entschiet il giug empau pli concentrau che la dumengia vargada encunter Domat, tuttina ha l’equipa surschau als patruns casa dad ir gia baul en avantatg. Suenter otg minutas han in defensur ed il goli da Schluein Glion buca saviu sedecider tgi che dueigi liberar suenter ina flanca dall‘ala dretga ed aschia lubiu a Sandro Willi da stuschar la balla da cuorta distanza da gol en. Suenter quella duscha freida ha Schluein Glion entschiet a far empau dapli per il giug ed alla fin d’ina fasa da pressiun eis ei reussiu a Lars Caduff d’egalisar cun in bi e ferm siet naven dalla lingia da sedisch. Il giug ei puspei vegnius pli ulivs e cura che tuts spitgavan sin il té da pausa eis ei tuttina aunc gartegiau a Sargans dad ir en avantatg. Marco Giordano ha retschiert la balla bien 20 meters avon il gol e cunquei che negin ha attaccau el, ha el empruau siu cletg cun in siet da distanza e tuc sur il davos um da Schluein Glion vi en la reit.

Suenter pausa han ils patruns casa dau empau pli defensiv e surschau il far il giug a Schluein Glion. L’equipa sursilvana ha empruau tut, igl ei denton entochen la fin buca gartegiau d’egalisar ni forsa schizun gudignar il giug. Memia pauc decisivas ein las attaccas stadas, memia bia cumbinaziuns han buca purtau fretg muort malprecisadads e memia bia ballas liungas ein stadas in leva preda per ils gronds e robusts defensurs da Sargans.

FC Sargans – US Schluein Glion 2:1 (2:1)

Riet. – 140 aspectaturs. – AR: Zanatta

Gols: 8. Willi 1:0, 22. Caduff 1:1, 43. Giordano 2:1.

Sargans: Dosch; Mathis, Weber, Kalberer, Schai; Walser, Kreis, Lutz (63. Ralph Schumacher), Giordano; Ronny Schumacher (66. Nuhiji), Willi.

Schluein Glion: Marco Cavegn; Silvan Welter, Matthias Derungs, Livio Derungs, Sergio Welter (78. Gartmann); Coray (78. Maissen), Luca Vinzens (90. Giacomelli), Marino Cavegn, Büchler (60. Bundi); Andreoli (82. Möglich), Caduff.

Remarcas: Schluein Glion senza Dermont e Truffer (reconvalescents); Hornacek (serraus); Airaghi, Fabrizio Cavegn, Tiziano Vinzens, Wellinger (absents). – Cartas mellnas: 42. Matthias Derungs (foul), 73. Silvan Welter (foul), 85. Nuhiji (foul). – Carta mellen/tgietschen: 90.+ 4. Nuhiji (sittar naven la balla). – Debut en 3. Ligia per ils giuvens Mattia Coray e Nicola Maissen. – Corners: 7:5.