L’equipa da Schluein Glion ei semussada dumengia sco in bien hosp. Cun dus veritabels schenghetgs ha ella possibilitau a l’equipa da casa dad ir cun dus gols en avantatg e cunquei che l’offensiva ha era buca gest giu siu meglier gi, da gudignar il giug senza stuer brigliar.
Strusch ha il giug entschiet sin la plazza sportiva Vial, nua ch’in vent criu e freid ha procurau per pauc emperneivlas relaziuns da dar e mirar ballapei, e gia ha Domat astgau retscheiver igl emprem schenghetg. L’emprema attacca da Domat ei vegnida frenada e Silvan Welter, enstagl baghegiar si l’emprema da Schluein Glion ha el denton surschau la balla al meglier attaccader da Domat, Lebien Nsingui, il qual ha buca schau rugar duas gadas e battiu il goli cun in ferm siet sut la traversa. Suenter ina pauc giavinonta emprema mesadad suonda cuort suenter pausa il secund schenghetg da Schluein Glion. David Hornacek setta la balla a Livio Derungs che vegn buca da controllar tala e sto surschar ella ad Obren Dragic che gi engrazia e marca cun in siet precis el cantun bass il secund gol per Domat.
Suenter quei secund schenghetg emprova Schluein Glion tut il pusseivel per aunc saver dar ina midada al giug, senza grond success. Memia pauc decisivas ein las attaccas, cunquei ch’ils attaccaders han era buca ligiau propi endretg las curegias da lur pantoflas. Cuort avon la fin ha ei lu dau aunc inagada empau acziun sil plaz. Nedeljko Mitrovic ei mitschaus dalla defensiun da Schluein Glion e curius persuls encunter il goli da Schluein Glion. Lez ha frenau el, quei denton cun tener la balla cul maun avon la lingia da sedisch. Igl arbiter ha mussau la carta cotschna e Silvan Welter ha surpriu il post da goli per las davosas minutas. Il culp liber ha purtau il 3:0 e la decisiun definitiva, quei era sche Luca Vinzens ha mo ina minuta pli tard procurau cun in bellezia siet da distanza per il resultad final. Strusch da crer che Schluein Glion ei tuttina aunc vegnius da sittar in gol, duront il giug entir ha ei fatg la pareta sco l’equipa savess aunc giugar gitg senza tuccar inagada la balla da gol en.
CB Domat/Ems – US Schluein Glion 3:1 (1:0)
Vial. – 150 aspectaturs. – AR: Trivigno
Gols: 1. Nsingui 1:0, 56. Dragic 2:0, 90. Dragic 3:0, 90.+ 2. Luca Vinzens 3:1.
Domat/Ems: Schneider; Caluori, Hanad Beso, Salihagic, Corucci; Dragic, Frizzoni, Casanova, Hanan Beso (65.Marusic); Mitrovic (90. Lala), Nsingui.
Schluein Glion: Hornacek; Silvan Welter, Giacomelli, Livio Derungs, Sergio Welter (64. Airaghi); Bundi, Luca Vinzens, Marino Cavegn, Tiziano Vinzens (72. Gartmann); Fabrizio Cavegn (59. Andreoli), Caduff.
Remarcas: Schluein Glion senza Dermont e Truffer (blessai), Matthias Derungs (absents). – Cartas mellnas: 21. Caluori (foul). 86. Corruci (reclamar). – Carta cotschna: 90. Hornacek (maun ordvart la zona da puniziun, Silvan Welter surpren il post da goli). – Corners: 1:5.