Terrada encunter il capogruppa

Suenter ch’il giug encunter il CB Laax ha stuiu vegnir refiers per la secunda gada, ei la secunda da Schluein serendida a Celerina, ha denton stuiu turnar a casa senza puncts. Il giug ordvart a Celerina ha giu biaras parallelas cul giug da casa encunter ils engiadines digl atun vargau – buc fatg ils gols davontier e vegni struffegiai davostier dall’efficienza digl adversari.

Gia ell’emprema minuta havess Arno Panier saviu tuccar al 0:1, el ha denton munchentau il gol per pauc suenter siu solo. Mo cuort pli tard ei la secunda schanza sedada pils hosps, puspei senza success. Meglier ha il FC Celerina fatg ei ella 10avla minuta. Ord il smugl ella da sedisch dall’USSI2 ei in dils attaccaders vegnius da spedir la balla ella reit al 1:0. Suenter quei gol ha l’equipa da casa surpriu il domini dil giug – il 2:0 han els buc dumignau da sittar. Cuort avon pausa havess l’USSI2 giu meritau in penalti. Suenter in solo sur la mesadad dil plaz ha Noah Weber vuliu giugar la balla en direcziun miez avon il gol digl adversari, in defensur da Celerina ha tuc la balla cul maun, igl arbiter ha denton buc schulau.

Ella secunda mesadad han ils hosps dalla Surselva fatg ina megliera pareta ch’ils engiadines. Success en fuorma d’in gol ha denton negina dallas numeruas schanzas da marcar purtau. Era en 200 ni 300 minutas havess in gol probablamein buc vuliu gartegiar quei gi a nossa secunda. Damai ch’il FC Celerina ha era buc sittau dapli gols, eis ei stau tiegl 1:0 en disfavur dall’USSI2. Aschia surprendan ils engiadines puspei igl emprem plaz ella tabella.

En in ulteriur derby interromontsch frunta la secunda dall’USSI sil CB Surses, sonda ils 04-05-2019 allas 17:00 a Tinizong.

FC Celerina – US Schluein Ilanz 2 1:0 (1:0)
San Gian, Celerina

Gols: 10. FC Celerina 1:0

US Schluein Ilanz 2: Marco Cavegn; Dario Casutt (70. Livio Casutt), Patrick Camenisch, Marc Camenisch, Sven Brasser (66. Ivan Derungs); Arno Panier, Dennis Camenisch, Gian Sgier, Ronny Della Morte; Dario Derungs, Noah Weber (75. Ronny Panier)

Remarcas: USSI 2 ei vegnida trenada dil cotrenader Silvan Frehner muort absenza dil cautrenader Corsin Derungs