Encunter il CB Trun/Rabius ha nossa secunda stuiu acceptar la tiarza terrada da quei atun. Il derbi a Trun ei vegnius menaus cun ina certa direzia, sco ins enconusch’ei da tals giugs. En vesta dallas acziuns ell’offensiva, ston ins conceder che l’equipa da casa ha buc engulau ils treis puncts.
Naven dall’emprema minuta ein omisduas equipas s’engaschadas cun in’aulta intensitad en quei giug. Gia suenter tschun minutas ha il CB Trun/Rabius tertgau d’haver marcau igl 1:0. Muort ordgiug ei quei gol denton vegnius annulaus digl arbiter. Empau pli tard ha Patrick Camenisch sfurzau il goli dall’equipa da casa da sestender empau en uorden cun in bi culp liber. Ella 41avla minuta eis ei lu propi gartegiau al CB Trun/Rabius da marcar igl 1:0, possiblitau da sbagls da nos giugadurs amiez e davos. Entochen pausa ei semidau nuot vid il resultat.
Ella secunda mesadad ei il cumbat per la balla aunc vegnius pli intensivs, las acziuns avon il gol in tec pli raras. A nos attaccaders eis ei buc propi gartegiau d’anflar in mied da surmuntar la defensiun digl adversari. Entgins siets memia pauc malsegirs e ballas aultas che han buc anflau igl adressat giavischau, ein stai memia pauc per saver egualisar il resultat. Il CB Trun/Rabius ei pliras gadas staus pli datier da marcar il 2:0. Encunter la fin dil giug ha l’USSI 2 empruau da vegnir al success cun ina formaziun aunc pli offensiva. Quei ha dau dapli libertads per cunterattaccas all’equipa da casa. Ina tala cunterattacca ha menau al resultat final da 2:0 pil CB Trun/Rabius ella 86avla minuta.
Suenter la mesadad dalla sesiun seresulta aschia il tierz plaz ella tabella per l’USSI2, davos il FC Celerina ed il CB Trun/Rabius. Quei ei ina buna prestaziun per l’equipa trenada da Corsin Derungs e Silvan Frehner. In cordial engraziament a tut ils aspectaturs che han accumpignau nossa secunda els giugs pli interessants e meins interessants da quei atun. Egl avrel 2019 entscheiva la runda da primavera, ils giugadurs dalla secunda vegnan segir puspei ad esser semtgai e motivai per las sfidas sil plaz da balla. Els davos onns ei numnadamein semussau che la runda da primavera schai meglier a quell’equipa che la runda d’atun.
CB Trun/Rabius – US Schluein Ilanz 2 2:0 (1:0)
Pustget, Trun
Gols: 41. CB Trun/Rabius 1:0, 86. CB Trun/Rabius 2:0
US Schluein Ilanz 2: Flurin Capaul; Dario Casutt, Patrick Camenisch, Marc Camenisch, Robin Studer; Fabrizio Bonolini (61. Hares Sadat), Gian Sgier, Arno Panier, Ronny Della Morte; Sven Brasser (79. Livio Casutt), Dario Derungs
Remarcas: admoniziuns USSI 2: 61. Gian Sgier (reclamar), 72. Patrick Camenisch (foul), 76. Sven Brasser (foul